[Back to Fitt 7]
Fitt 8
630 Thô gifragn ic that sân aftar thiu | slîðmôd cuning
631 thero uuârsagono uuord | them uurekkiun sagda,
632 thea thar an elilendi | erlos uuârun
633 ferran gifarana, | endi he frâgoda aftar thiu,
634 huan sie an ôstaruuegun | êrist gisâhin
635 thana cuningsterron cuman, | cumbal liuhtien
636 hêdro fon himile. | Sie ni uueldun is im thô helen eouuiht,
637 ac sagdun it im sôðlîco. | Thô hêt he sie an thana sîð faran,
638 hêt that sie ila ârundi | al undarfundin
639 umbi thes kindes cumi, | endi the cuning selb=o gibôd
640 suîðo hardlico, | hêrro Iudeono,
641 them uuîsun mannun, | êr than sie fôrin uuestan forð,
642 that sie im eft gicûðdin, | huar he thana cuning scoldi
643 sôkean at is selðon; | quað that he thar uueldi mid is gisîðun tô,
644 bedan te them barne. | Than hogda he im te banon uuerðan
645 uuâpnes eggiun. | Than eft uualdand god
646 thâhte uuid= them thinga: | he mahta athengean mêr,
647 gilêstean an thesum liohte: | that is noh lango skîn,
648 gicûðid craft godes. | Thô gengun eft thiu cumbl forð
649 uuânum undar uuolcnun. | Thô uuârun thea uuîson man
650 fûsa te faranne: | giuuitun im forð thanan
651 balda an bodskepi: | uueldun that barn godes
652 selb=on sôkean. | Sie ni habdun thanan gisîðeas mêr,
653 bûtan that sie thrie uuârun: | uuissun im thingo giskêd=,
654 uuârun im glauue gumon, | the thea geb=a lêddun.
655 Than sâhun sie sô uuîslîco | undar thana uuolcnes skion,
656 up te them hôhon himile, | huô fôrun thea huuîton sterron
657 -- antkendun sie that cumbal godes --, | thiu uuârun thurh Krista herod
658 giuuarht te thesero uueroldi. | Thea uueros aftar gengun,
659 folgodun ferahtlîco | -- sie frumide the mahte --
660 antthat sie gisâhun, | sîðuuôrige man,
661 berht bôcan godes, | blêc an himile
662 stillo gistanden. | The sterro liohto skên
663 huuît ob=ar them hûse, | thar that hêlage barn
664 uuonode an uuilleon | endi ina that uuîf biheld,
665 thiu thiorne githiudo. | Thô uuarð thero thegno hugi
666 blîði an iro briostun: | bi them bôcna forstôdun,
667 that sie that friðubarn godes | funden habdun,
668 hêlagna heb=encuning. | Thô sie an that hûs innan
669 mid iro geb=un gengun, | gumon ôstronea,
670 sîðuuôrige man: | sân antkendun
671 thea uueros uualdand Krist. | Thea uurekkion fellun
672 te them kinde an kneobeda | endi ina an cuninguuîsa
673 gôdan grôttun | endi im thea geb=a drôgun,
674 gold endi uuîhrôc | bi godes têcnun
675 endi myrra thar mid. | Thea man stôdun garouua,
676 holde for iro hêrron, | thea it mid iro handun sân
677 fagaro antfengun. | Thô giuuitun im thea ferahton man,
678 seggi te seld=on | sîðuuôrige,
679 gumon an gastseli. | Thar im godes engil
680 slâpandiun an naht | suueb=an gitôgde,
681 gidrog im an drôme, | al so it drohtin self,
682 uualdand uuelde, | that im thûhte that man im mid uuordun gibudi,
683 that sie im thanan ôðran uueg, | erlos fôrin,
684 liðodin sie te lande | endi thana lêðan man,
685 Erodesan | eft ni sôhtin,
686 môdagna cuning. | Thô uuard= morgan cuman
687 uuânum te thesero uueroldi. | Thô bigunnun thea uuîson man
688 seggean iro sueb=anos; | selb=on antkendun
689 uualdandes uuord, | huuand sie giuuit mikil
690 bârun an iro briostun: | bâdun alouualdon,
691 hêron heb=encuning, | that sie môstin is huldi forð,
692 giuuirkean is uuilleon, | quâðun that sea ti im habdin giuuendit hugi,
693 iro môd morgan gihuuem. | Thô fôrun eft thie man thanan,
694 erlos ôstronie, | al sô im the engil godes
695 uuordun giuuîsde: | nâmun im uueg ôðran,
696 fulgengun godes lêrun: | ni uueldun themu Iudeo cuninge
697 umbi thes barnes giburd | bodon ôstronie,
698 sîðuuôrige man | seggian giouuiht,
699a ac uuendun im eft an iro uuillion. |
[Fitt 9]
[Fitt index]