[Back to Fitt 8]
Fitt 9
699b Thô uuarð sân aftar thiu uualdandes,
700 godes engil cumen | Iosepe te sprâcun,
701 sagde im an suuefne | slâpandium an naht,
702 bodo drohtines, | that that barn godes
703 slîðmôd cuning | sôkean uuelda,
704 âhtean is aldres; | `nu scaltu ine an Aegypteo
705 land antlêdean | endi undar them liudiun uuesan
706 mid thiu godes barnu | endi mid theru gôdan thiornan,
707 uunon undar themu uuerode, | untthat thi uuord cume
708 hêrron thînes, | that thu that hêlage barn
709 eft te thesum landscepi | lêdian môtis,
710 drohtin thînen.' | Thô fon them drôma ansprang
711 Ioseph an is gestseli, | endi that godes gibod
712 sân antkenda: | giuuêt im an thana sîð thanen
713 the thegan mid theru thiornon, | sôhta im thiod ôðra
714 ob=ar brêdan berg: | uuelda that barn godes
715 fîundun antfôrian. | Thô gifrang aftar thiu
716 Erodes the cuning, | thar he an is rîkea sat,
717 that uuârun thea uuîson man | uuestan gihuuorb=an
718 ôstar an iro ôðil | endi fôrun im ôðran uueg:
719 uuisse that sie im that ârundi | eft ni uueldun
720 seggian an is selðon. | Thô uuarð im thes an sorgun hugi,
721 môd mornondi, | quað that it im thie man dedin,
722 heliðos te hônðun. | Thô he sô hriuuig sat,
723 balg ina an is briostun, | quað that he is mahti betaron râd,
724 ôðran githenkien: | `nu ic is aldar can,
725 uuêt is uuintergitalu: | nu ic giuuinnan mag,
726 that he io ob=ar thesaro erðu | ald ni uuirðit,
727 hêr undar thesum heriscepi.' | Thô he sô hardo gibôd,
728 Erodes ob=ar is riki, | hêt thô is rinkos faran
729 cuning thero liudio, | hêt that sie kinda sô filo
730 thurh iro handmagen | hôb=du binâmin,
731 sô manag barn umbi Bethleem, | sô filo sô thar giboran uurði,
732 an tuêm gêrun atogan. | Tionon frumidon
733 thes cuninges gisîðos. | Thô scolda thar sô manag kindisc man
734 sueltan sundiono lôs. | Ni uuarð sið noh êr
735 giâmarlîcara forgang | iungaro manno,
736 armlîcara dôð. | Idisi uuiopun,
737 môdar managa, | gisâhun iro megi spildian:
738 ni mahte siu im nio giformon, | thoh siu mid iro faðmon tuêm
739 iro êgan barn | armun bifengi,
740 liof endi luttil, | thoh scolda is simbla that lîf geb=an,
741 the magu for theru môdar. | Mênes ni sâhun,
742 uuîties thie uuamscaðon: | uuâpnes eggiun
743 fremidun firinuuerc mikil. | Fellun managa
744 maguiunge man. | Thia môdar uuiopun
745 kindiungaro qualm. | Cara uuas an Bethleem,
746 hofno hlûdost: | thoh man im iro herton an tuê
747 sniði mid suerdu, | thoh ni mohta im gio sêrara dâd
748 uuerðan an thesaro uueroldi, | uuîb=un managun,
749 brûdiun an Bethleem: | gisâhun iro barn biforan,
750 kindiunge man, | qualmu sueltan
751 blôdag an iro barmun. | Thie banon uuîtnodun
752 unsculdige scole: | ni biscrib=un giouuiht
753 thea man umbi mênuuerk: | uueldun mahtigna,
754 Krist selb=on aquellian. | Than habde ina craftag god
755 gineridan uuið iro nîðe, | that inan nahtes thanan
756 an Aegypteo land | erlos antlêddun,
757 gumon mid Iosepe | an thana grôneon uuang,
758 an erðono beztun, | thar ên aha fliutid,
759 Nîlstrôm mikil | norð te sêuua,
760 flôdo fagorosta. | Thar that friðubarn godes
761 uuonoda an uuilleon, | antthat uurd fornam
762 Erodes thana cuning, | that he forlêt eldeo barn,
763 môdag manno drôm. | Thô scolda thero marca giuuald
764 êgan is erb=iuuard: | the uuas Archelâus
765 hêtan, heritogo | helmberandero:
766 the scolda umbi Hierusalem | Iudeono folkes,
767 uuerodes giuualdan. | Thô uuard= uuord cuman
768 thar an Egypti | eðiliun manne,
769 that he thar te Iosepe, | godes engil sprac,
770 bodo drohtines, | hêt ina eft that barn thanan
771 lêdien te lande. | `nu hab=ad= thit lioht afgeb=en', quað he,
772 'Erodes the cuning; | he uuelde is âhtien giu,
773 frêson is ferahas. | Nu maht thu an friðu lêdien
774 that kind undar euua cunni, | nu the cuning ni lib=od,
775 erl ob=armôdig.' | Al antkende
776 Iosep godes têcan: | geriuuide ina sniumo
777 the thegan mit thera thiornun, | thô sie thanan uueldun
778 bêðiu mid thiu barnu: | lêstun thiu berhton giscapu,
779 uualdandes uuillion, | al sô he im êr mid is uuordun gibôd.
[Fitt 10]
[Fitt index]