[Back to Fitt 69]
Fitt 70
5865 Hie hab=it sia iu furfarana | endi ist im forð hinan
5866 an Galileo land, | thar ina eft is iungron sculun,
5867 gisehan is gisîðos.' | Thuo uuarð sân after thiu
5868 them uuib=on an uuillon, | that sia gihôrdun sulic uuord sprecan.
5869 cûðian thia craft godes | -- uuârun im sô acumana thuo noh
5870 gie sô forahta gefrumida --: | giuuitun im forð thanan
5871 fan them grab=e gangan | endi sagdun them iungron Cristes
5872 seldlîc gisiuni, | thar sia sorogondi
5873 bidun sulikero buota. | Thuo uuurðun ôc an thia burg cumana
5874 Iudeono uuardos, | thia ob=ar themo grab=e sâtun
5875 alla langa naht | endi thes lîchamen thar,
5876 huodun thes hrêuues. | Sia sagdun thero hêri Iudeono,
5877 huilica im thar anduuarda | egison quâmun,
5878 seldlîc gisiuni, | sagdun mid uuordon,
5879 al sô it giduan uuas | an thero drohtines craft,
5880 ni miðun an iro muode. | Thuo budun im mêðmo filo
5881 Iudeo liudi, | gold endi silub=ar,
5882 saldun im sinc manag, | te thiu that sia it ni sagdin forð,
5883 ne mâridin thero menigi: | `ac queðat that iu môði hugi
5884 ansueb=idi mid slâpu | endi that thar quâmin is gisîðos tuo,
5885 farstâlin ina an them stêne. | Simnen uuesat gi an strîde mid thiu,
5886 forð an flîte: | ef it uuirðit them folctogen cûð,
5887 uui gihelpat iu uuið thena hêrosten, | that hie iu harmes uuiht,
5888 lêðes ni gilêstid.' | Thuo nâmun sia an them liudon filo
5889 diurero mêðmo, | dâdun all sô sia bigunnun
5890 -- ne giuueldun iro uuillion -- | dâdun sô uuîdo cûð
5891 them liudon after them lande, | that sia sulica lugina uuoldun
5892 ahebbian be than hêlagan drohtin. | Than uuas eft gihêlid hugi
5893 iungron Cristes, | thuo sia gihôrdun thiu guodun uuîf
5894 mârian thia maht godes; | thuo uuârun sia an iro muode frâha,
5895 gie im te them grab=e bêðia, | Iohannes endi Petrus
5896 runnun ob=astlîco: | uuarð êr cuman
5897 Iohannes thie guodo, | endi im ob=ar them grab=e gistuod,
5898 antat thar sân after quam | Sîmon Petrus,
5899 erl ellanruof | endi im thar in giuuêt
5900 an that graf gangan: | gisah thar thes godes barnes,
5901 hrêogiuuâdi | hêrren sînes
5902 lînin liggian, | mid thiu uuas êr thie lîchamo
5903 fagaro bifangan; | lag thie fano sundar,
5904 mit them uuas that hôb=id bihelid | hêlages Cristes,
5905 rîkies drohtines, | than hie an thesaro rastu uuas.
5906 Thuo geng im ôc Iohannes | an that graf innan
5907 sehan seldlîc thing; | uuarð im sân after thiu
5908 antlocan is gilôb=o, | that hie uuissa, that scolda eft an thit lioht cuman
5909 is drohtin diurlîco, | fan dôðe astandan
5910 up fan erðu. | Thuo giuuitun im eft thanan
5911 Iohannes endi Petrus, | endi quâmun thia iungron Cristes,
5912 thia gisîðos tesamne. | Than stuod sêragmuod
5913 ên thera idiso | ôðersîðu
5914 griotandi ob=ar them grab=e, | uuas iro iâmar muod --
5915 Maria uuas that Magdalena --, | uuas iro muodgithâht,
5916 seb=o mit sorogon giblandan, | ne uuissa huarod siu sôkian scolda
5917 thena hêrron, thar iro uuârun at thia helpa gilanga. | Siu ni mohta thuo hofnu auuîsan,
5918 that uuîf ni mahta uuôp forlâtan: | ne uuissa huarod siu sia uuendian scolda;
5919 gimerrid uuârun iro thes muodgithâhti. | Thuo gisah siu thena mahtigan thar
5920 Criste standan, | thuoh siu ina cûðlîco || antkennian ni mohti, | êr than hie ina cûðian uuelda,
5921 seggian that hie it selb=o uuâri. | Hie frâgoda huat siu sô sêro biuuiepi,
5922 sô harmo mid hêton trahnin. | Siu quad=, that siu umbi iro hêrron ni uuissi
5923 te uuâren, huarod hie uuerðan scoldi: | `ef thu ina mi giuuîsan mohtis,
5924 frô mîn, ef ik thik frâgon gidorsti, | ef thu ina hier an theson felise ginâmis,
5925 uuîsi ina mi mid uuordon thînon: | than uuâri mi allaro uuilliono mêsta,
5926 that ik ina selb=o gisâhi.' | Sia ni uuissa, that sia thie suno drohtines
5927 gruotta mid gôdaro sprâcun: | siu uuânda that it thie gardari uuâri,
5928 hofuuard hêrren sînes. | Thuo gruotta sia thie hêla~o drohtin,
5929 bi namen neriendero best: | siu geng im thuo nâhor sniumo.
5930 that uuîf mid uuillion guodan, | antkenda iro uualdand selb=an,
5931 mîðan siu is thuru thia minnia ni uuissa: | uuelda ina mid iro mundon grîpan,
5932 thiu fêhmia an thena folko drohtin, | nob=an that iro friðubarn godes
5933 uuerida mid uuordon sînon, | quað that siu ina mid uuihti ni mosti
5934 handon anthrînan: | `ik ni stêg noh,' quathie, `te them himiliscon fader;
5935 ac îli thu nu ofstlîco | endi them erlon cûði,
5936 bruoðron mînon, | that ik ûser bêðero fader,
5937 alauualdan | iuuuan endi mînan,
5938 suoðfastan god | suokean uuilliu.'
[Fitt 71]
[Fitt index]