[Back to Fitt 68]
Fitt 69
5802b Lâgun tha uuardos,
5803 thia gisîðos sâmquica: | sân up ahlêd
5804 thie grôto stên fan them grab=e, | sô ina thie godes engil
5805 gihuerib=ida an halb=a, | endi im uppan them hlêuue gisat
5806 diurlîc drohtines bodo. | Hie uuas an is dâdion gelîc,
5807 an is ansiunion, | sô huem sô ina muosta undar is ôgon scauuon,
5808 sô bereht endi sô blîði | all sô blicsmun lioht;
5809 uuas im is giuuâdi | uuintarcaldon
5810 snêuue gilîcost. | Thuo sâuun sia ina sittian thar,
5811 thiu uu~f uppan them giuuendidan stêne, | endi im fan them uulitie quâmun,
5812 them idison sulica egison tegegnes: | all uuurðun fan them grurie
5813 thiu frî an forahton mikilon, | furðor ne Pidorstun
5814 te themo grab=e gangan, | êr sia thie godes engil,
5815 uualdandes bodo | uuordon gruotta,
5816 quað that hie iro ârundi | all bicunsti,
5817 uuerc endi uuillion | endi thero uuîb=o hugi,
5818 hiet that sia im ne andrêdin: | `ik uuêt that gi iuuuan drohtin suokat,
5819 neriendon Crist | fan Nazarethburg,
5820 thena thi hier quelidun | endi an crûci slôgun
5821 Iudeo liudi | endi an graf lagdun
5822 sundilôsian. | Nu nist hie selb=o hier,
5823 ac hie ist astandan iu, | endi sind thesa stedi lârea,
5824 thit graf an theson griote. | Nu mugun gi gangan herod
5825 nâhor mikilu | -- ik uuêt that is iu ist niud sehan
5826 an theson stêne innan --: | hier sind noh thia stedi scîna,
5827 thar is lîchamo lag.' | Lungra fengun
5828 gibada an iro brioston | blêca idisi,
5829 uulitiscôni uuîf: | uuas im uuilspell mikil
5830 te gihôrianne, | that im fan iro hêrren sagda
5831 engil thes alouualden. | Hiet sia eft thanan
5832 fan them grab=e gangan | endi faran te them iungron Cristes,
5833 seggian them is gisîðon | suoðon uuordon,
5834 that iro drohtin uuas | fan dôðe astandan.
5835 Hiet ôc an sundron | Sîmon Petruse
5836 uuillspell mikil | uuordon cûðian,
5837 cumi drohtines, | gie that Crist selb=o
5838 uuas an Galileo land, | `thar ina eft is iungron sculun,
5839 gisehan is gisîðos, | sô hie im êr selb=o gisprac
5840 uuâron uuordon.' | Reht sô thuo thiu uuîf thanan
5841 gangan uueldun, | sô stuodun im tegegnes thar
5842 engilos tuêna | an alahuîton
5843 uuânamon giuuâdion | endi sprâcun im mid iro uuordon tuo
5844 helaglîco: | hugi uuarð giblôðid
5845 then idison an egison: | ne mahtun an thia engilos godes
5846 bi themo uulite scauuon: | uuas im thiu uuânami te strang,
5847 te suîði te sehanne. | Thuo sprâcun im sân angegin
5848 uualdandes bodun | endi thiu uuîf frâgodun,
5849 te huî sia Cristan tharod | quican mid dôdon,
5850 suno drohtines | suokian quâmin
5851 ferahes fullan; | `nu gi ina ni findat hier
5852 an theson stêngrab=e, | ac hie ist astandan nu
5853 an is lîchamen: | thes gi gilôb=ian sculun
5854 endi gihuggian thero uuordo, | the hie iu te uuâron oft
5855 selb=o sagda, | than hie an iuuuon gisîðe uuas
5856 an Galilealande, | huô hie scoldi gigeb=an uuerðan,
5857 gisald selb=o | an sundigaro manno,
5858 hettiandero hand, | hêlag drohtin,
5859 that sia ina quelidin | endi an crûci slôgin,
5860 dôdan gidâdin | endi that hie scoldi thuru drohtines craft
5861 an thriddion dage | thioda te uuillion
5862 libbiandi astandan. | Nu hab=it hie all gilêstid sô,
5863 gifrumid mid firihon: | îliat gi nu forð hinan,
5864 gangat gâhlîco | endi duot it them is iungron cûð.
[Fitt 70]
[Fitt index]