[Back to Fitt 67]
Fitt 68
5713 Sô thuo gisêgid uuarð | seðle nâhor
5714 hêdra sunna | mid heb=antunglon
5715 an them druob=en dage, | thuo geng im ûses drohtines thegan
5716 -- uuas im glau gumo, | iungro Cristes
5717 managa huîla, | sô it thar manno filo
5718 ne uuissa te uuâron, | huand hie it mid is uuordon hal
5719 Iud=eono gumscipie: | Ioseph uuas hie hêtan,
5720 darnungo uuas hie ûses drohtines iungro: | hie ni uuelda thero farduanun thiod
5721 folgon te ênigon firinuuercon, | ac hie bêd im under them folke Iudeono,
5722 hêlag himilo rîkies -- | hie geng im thuo uuið thena heritogon mahlian,
5723 thingon uuið thena thegan kêsures, | thigida ina gerno,
5724 that hie muosti alôsian | thena lîkhamon
5725 Cristes fan themo crûcie, | thie thar giquelmid stuod,
5726 thes guoden fan them galgen | endi an graf leggian,
5727 foldu bifelahan. | Im ni uuelda thie folctogo thuo
5728 uuernian thes uuillien, | ac im giuuald fargaf,
5729 that hie sô muosti gifrummian. | Hie giuuêt im thuo forð thanan
5730 gangan te them galgon, | thar hie uuissa that godes barn,
5731 hrêo hangondi | hêrren sînes,
5732 nam ina thuo an thero niuuun ruodun | endi ina fan naglon atuomda,
5733 antfeng ina mid is faðmon, | sô man is frôhon scal,
5734 liob=es lîchamon, | endi ina an lîne biuuand,
5735 druog ina diurlîco | -- sô uuas thie drohtin uuerð --,
5736 thar sia thia stedi hab=dun | an ênon stêne innan
5737 handon gihauuuan, | thar gio heliðo barn
5738 gumon ne bigruob=on. | Thar sia that godes barn
5739 te iro landuuîsu, | lîco hêlgost
5740 foldu bifulhun | endi mid ênu felisu belucun
5741 allaro grab=o guodlîcost. | Griotandi sâtun
5742 idisi armscapana, | thia that all forsâuun,
5743 thes gumen grimman dôð. | Giuuitun im thuo gangan thanan
5744 uuôpiandi uuîf | endi uuara nâmun,
5745 huô sia eft te them grab=e | gangan mahtin:
5746 hab=dun im farseuuana | soroga ginuogia,
5747 mikila muodkara: | Maria uuârun sia hêtana,
5748 idisi armscapana. | Thuo uuarð ab=and cuman,
5749 naht mid neflu. | Nîðfolc Iudeono
5750 uuarð an moragan eft, | menigi gisamnod,
.....................................................
5751 rekidun an rûnon: | `huat, thu uuêst, huô thit rîki uuas
5752 thuru thesan ênan man | all gituîflid,
5753 uuerod giuuorra | n: | nu ligid hie uuundon siok,
5754 diopa bidolb=an. Hie sagda simnen, that hie scoldi fan dôðe astandan
5755 an thriddian dage. | Thius thiod gilôb=it te filo,
5756 thit uuerod after is uuordon. | Nu thu hier uuardon hêt,
5757 ob=ar them grab=e gômian, | that ina is iungron thar
5758 ne farstelan an themo stêne | endi seggian than, that hie astandan sî,
5759 rîki fan raston: | than uuirðit thit rinco folc
5760 mêr gimerrid, | ef sia it biginnat mârian hier.'
5761 Thuo uuurðun thar giscerida | fan thero scolu Iudeono
5762 uueros te thero uuahtu: | giuuitun im mid iro giuuâpnion tharod
5763 te them grab=e gangan, | thar sia scoldun thes godes barnes
5764 hrêuues huodian. | Uuarð thie hêlago dag
5765 Iudeono fargangan. | Sia ob=ar themo grab=e sâtun,
5766 uueros an thero uuahtun | uuannom nahton,
5767 bidun undar iro bordon, | huan êr thie berehto dag
5768 ob=ar middilgard | mannon quâmi,
5769 liudon te liohte. | Thuo ni uuas lang te thiu,
5770 that thar uuarð thie gêst cuman | be godes crafte,
5771 hâlag âðom | undar thena hardon stên
5772 an thena lîchamon. | Lioht uuas thuo giopanod
5773 firiho barnon te frumu: | uuas fercal manag
5774 antheftid fan helldoron | endi te himile uueg
5775 giuuaraht fan thesaro uueroldi. | Uuânom up astuod
5776 friðubarn godes, | fuor im thuo thar hie uuelda,
5777 sô thia uuardos thes | uuiht ni afsuob=un,
5778 derb=ia liudi, | huan hie fan them dôðe astuod,
5779 arês fan thero rastun. | Rincos sâtun
5780 umbi that graf ûtan, | Iudeo liudi,
5781 scola mid iro scildion. | Scrêd forðuuardes
5782 suigli sunnun lioht. | Sîðodun idisi
5783 te them grab=e gangan, | gumcunnies uuîf,
5784 Mariun munilîca: | habdun mêðmo filo
5785 gisald uuiðer salb=um, | silub=res endi goldes,
5786 uuerðes uuiðer uuurtion, | sô sia mahtun auuinnan mêst,
5787 that sia thena lîchamon | liob=es hêrren,
5788 suno drohtines, | salb=on muostin,
5789 uuundun uuritanan. | Thiu uuîf soragodun
5790 an iro seb=on suîðo, | endi suma sprâcun,
5791 huie im thena grôtan stên | fan themo grab=e scoldi
5792 gihuereb=ian an halb=a, | the sia ob=ar that hrêo sâuuun
5793 thia liudi leggian, | thuo sia thena lîchamon thar
5794 befulhun an themo felise. | Sô thiu frî hab=dun
5795 gegangan te them gardon, | that sia te them grab=e mahtun
5796 gisehan selb=on, | thuo thar suôgan quam
5797 engil thes alouualdon | ob=ana fan radure,
5798 faran an feðerhamon, | that all thiu folda an scian,
5799 thiu erða dunida | endi thia erlos uuurðun
5800 an uuêkan hugie, | uuardos Iuðeono,
5801 bifellun bi them forahton: | ne uuândun ira ferah êgan,
5802a lîf langerun huîl. |
[Fitt 69]
[Fitt index]