[Back to Fitt 19]

Fitt 20

1691 Ne sculun gi ênigumu manne | unrehtes uuiht,
1692 derb=ies adêlean, | huuand the dôm eft cumid
1693 ob=ar thana selb=on man, | thar it im te sorgon scal,
1694 uuerðan them te uuîtea, | the hîr mid is uuordun gesprikid
1695 unreht ôðrum. | Neo that iuuuar ênig ne dua
1696 gumono an thesom gardon | geldes ettho côpes,
1697 that hi unreht gimet | ôðrumu manne
1698 mênful maco, | huuand it simbla môtean scal
1699 erlo gehuuilicomu, | sulic he it ôðrumu gedôd,
1700 cumid it im eft tegegnes, | thar he gerno ne uuili
1701 gesehan is sundeon. | Ôc scal ic iu seggean noh,
1702 huuar gi iu uuardon sculun | uuîteo mêsta,
1703 mênuuerc manag: | te huuî scalt thu ênigan man besprekan,
1704 brôðar thînan, | that thu undar is brâhon gesehas
1705 halm an is ôgon, | endi gehuggean ni uuili
1706 thana suâran balcon, | the thu an thînoro siuni hab=as,
1707 hard trio endi heb=ig. | Lât thi that an thînan hugi fallan,
1708 huuô thu thana êrist alôseas: | than skînid thi lioht beforan,
1709 ôgun uuerðad thi geoponot; | than maht thu aftar thiu
1710 suâses mannes gesiun | sîðor gebôtean,
1711 gehêlean an is hôb=de. | mag that an is hugi mêra
1712 an thesoro middilgard | manno gehuuilicumu,
1713 uuesan an thesoro uueroldi, | that hi hîr uuammas geduot,
1714 than hi ahtogea | ôðres mannes
1715 saca endi sundea, | endi hab=ad im selb=o mêr
1716 firinuuerco gefrumid. | Ef hi uuili is fruma lêstean,
1717 than scal hi ina selb=on êr | sundeono atômean,
1718 lêðuuerco lôson: | sîðor mag hi mid is lêrun uuerðan
1719 heliðun te helpu, | sîðor hi ina hluttran uuêt,
1720 sundeono sicoran. | Ne sculun gi suînum teforan
1721 iuuua meregrîton macon | ettho mêðmo gestriuni,
1722 hêlag halsmeni, | huuand siu it an horu spurnat,
1723 suluuiad an sande: | ne uuitun sûb=reas geskêd=,
1724 fagaroro fratoho. | Sulic sint hîr folc manag,
1725 the iuuua hêlag uuord | hôrean ne uuillead,
1726 fulgangan godes lêrun: | ne uuitun gôdes geskêd=,
1727 ac sind im lâri uuord | leob=oron mikilu,
1728 umbitharb=i thing, | thanna theotgodes
1729 uuerc endi uuilleo. | Ne sind sie uuirðige than,
1730 that sie gehôrean iuuua hêlag uuord, | ef sie is ne uuillead an iro hugi thenkean,
1731 ne lînon ne lêstean. | Them ni seggean gi iuuuoro lêron uuiht,
1732 that gi thea sprâca godes | endi spel managu
1733 ne farleosan an them liudiun, | thea thar ne uuillean gilôb=ean tô,
1734 uuâroro uuordo. | Ôc sculun gi iu uuardon filu
1735 listiun undar thesun liudiun, | thar gi aftar thesumu lande farad,
1736 that iu thea luggeon ne mugin | lêron besuîcan
1737 ni mid uuordun ni mid uuercun. | Sie cumad an sulicom geuuâdeon te iu,
1738 fagoron fratohon: | thoh hebbead sie fêcnan hugi;
1739 thea mugun gi sân antkennean, | gi sie cuman gesehad:
1740 sie sprecad uuîslîc uuord, | thoh iro uuerc ne dugin,
1741 thero thegno gethâhti. | Huuand gi uuitun, that eo an thorniun ne sculun
1742 uuînberi uuesan | eftha uuelon eouuiht,
1743 fagororo fruhteo, | nec ôc fîgun ne lesad
1744 heliðos an hiopon. | That mugun gi undarhuggean uuel,
1745 that eo the ub=ilo bôm, | thar he an erðu stâd,
1746 gôden uuastum ne gib=id, | nec it ôc god ni gescôp,
1747 that the gôdo bôm | gumono barnun
1748 bâri bittres uuiht, | ac cumid fan alloro bâmo gehuilicumu
1749 sulic uuastom te thesero uueroldi, | im fan is uurteon gedregid,
1750 ettha berht ettha bittar. | That mênid thoh breosthugi,
1751 managoro môdseb=on | manno cunnies,
1752 huuô alloro erlo gehuilic | ôgit selb=o,
1753 meldod mid is mûðu, | huilican he môd hab=ad,
1754 hugi umbi is herte: | thes ni mag he farhelan eouuiht,
1755 ac cumad fan them ub=ilan man | inuuidrâdos,
1756 bittara balusprâca, | sulic hi an is breostun hab=ad
1757 geheftid umbi is herte: | simbla is hugi cûðid,
1758 is uuilleon mid is uuordun, | endi farad is uuerc aftar thiu.
1759 cumad fan themu gôdan manne | glau anduuordi,
1760 uuîslîc fan is geuuittea, | that hi simbla mid is uuordu gesprikid,
1761 man mid is mûðu | sulic, he an is môde hab=ad
1762 hord umbi is herte. | Thanan cumad thea hêlagan lêra,
1763 suuîðo uunsam uuord, | endi sculun is uuerc aftar thiu
1764 theodu gethîhan, | thegnun managun
1765 uuerðan te uuilleon, | al it uualdand self
1766 gôdun mannun fargib=id, | god alomahtig,
1767 himilisc hêrro, | huand sie âno is helpa ni mugun
1768 ne mid uuordun ne mid uuercun | uuiht athengean
1769 gôdes an thesun gardun. | Bethiu sculun gumono barn
1770 an is ênes craft | alle gilôb=ean.
[Fitt 21] [Fitt index]