[Back to Fitt 64]
Fitt 65
5427 Thuo uuarð thas thie uurêðo giuuaro, | uuamscaðono mêst,
5428 Satanas selb=o, | thuo thiu seola quam
5429 Iudases an grund | grimmaro helliun --
5430 thuo uuissa hie te uuâren, | that that uuas uualdand Crist,
5431 barn drohtines, | that thar gibundan stuod;
5432 uuissa thuo te uuâron, | that hie uuelda thesa uuerold alla
5433 mid is henginnia | hellia githuinges,
5434 liudi alôsian | an lioht godes.
5435 That uuas Satanase | sêr an muode,
5436 tulgo harm an is hugie: | uuelda is helpan thuo,
5437 that im liudio barn | lîf ne binâmin,
5438 ne quelidin an crûcie, | ac hie uuelda, that hie quic lib=di,
5439 te thiu that firiho barn | fernes ne uuurðin,
5440 sundiono sicura. | Satanas giuuêt im thuo,
5441 thar thes heritogen | hîuuiski uuas
5442 an thero burg innan. | Hie thero is brûdi bigann,
5443 thera idis opanlîco | unhiuri fîond
5444 uuunder tôgian, | that sia an uuordhelpon
5445 Criste uuâri, | that hie muosti quic libbian,
5446 drohtin manno | -- hie uuas iu than te dôðe giscerid --
5447 uuissa that te uuâron, | that hie im scoldi thia giuuald biniman,
5448 that hie sia ob=ar thesan middilgard | sô mikila ni hab=di,
5449 ob=ar uuîda uuerold. | That uuîf uuarð thuo an forahton,
5450 suîðo an sorogon, | thuo iru thiu gisiuni quâmun
5451 thuru thes dernien dâd | an dages liohte,
5452 an heliðhelme bihelid. | Thuo siu te iru hêrren anbôd,
5453 that uuîf mid iro uuordon | endi im te uuâren hiet
5454 selb=on seggian, | huat iro thar te gisiunion quam
5455 thuru thena hêlagan mann, | endi im helpan bad,
5456 formon is ferhe: | `ik hebbiu hier sô filo thuru ina
5457 seldlîkes giseuuan, | sô ik uuêt, that thia sundiun sculun
5458 allaro erlo gihuem | ub=ilo githîhan,
5459 sô im fruocno tuo | ferahes âhtið.'
5460 Thie segg uuarð thuo an sîðe, | antat hie sittian fand
5461 thena heritogon | an huarab=e innan
5462 an them stênuuege, | thar thiu strâta uuas
5463 felison gifuogid. | Thar hie te is frôhon geng,
5464 sagda im thes uuîb=es uuord. | Thuo uuarð im uurêð hugi,
5465 them heritogen, | -- huarab=oda an innan --,
5466 giblôðit briostgithâht: | uuas im bêðies uuê,
5467 gie that sea ina sluogin | sundia lôsan,
5468 gie it bi them liudion thuo | forlâtan ne gidorsta
5469 thuru thes uuerodes uuord. | Uuarð im giuuendid thuo
5470 hugi an herten | after thero hêri Iudeono,
5471 te uuerkeanne iro uuillion: | ne uuardoda im nieuuiht
5472 thia suârun sundiun, | thia hie im thar thuo selb=o gideda.
5473 Hiet im thuo te is handon dragan | hluttran brunnion,
5474 uuatar an uuêgie, | thar hie furi them uuerode sat,
5475 thuôg ina thar for thero thioda | thegan kêsures,
5476 hard heritogo | endi thuo fur thero hêri sprac,
5477 quað that hie ina thero sundiono thar | sicoran dâdi,
5478 uurêðero uuerco: | `ne uuilliu ik thes uuihtes plegan,' quathie,
5479 `umbi thesan hêlagan mann, | ac hleotad gi thes alles,
5480 gie uuordo gie uuerco, | thes gi im hêr te uuîtie giduan.'
5481 Thuo hreop all saman | heriscipi Iudeono,
5482 thiu mikila menigi, | quâðun that sia uueldin umbi thena man plegan
5483 derab=oro dâdio: | `fare is drôr ob=ar ûs,
5484 is bluod endi is baneði | endi ob=ar ûsa barn sô samo,
5485 ob=ar ûsa ab=aron thar after -- | uui uuilliat is alles plegan,' quaðun sia,
5486 `umbi thena slegi selb=on, -- | ef uui thar êniga sundia giduan!'
5487 Ageb=an uuarð thar thuo furi them Iudeon | allaro gumono besta
5488 hettendion an hand, | an herubendion
5489 narauuo ginôdid, | thar ina nîðhuata,
5490 fîond antfengun: | folc ina umbihuarf,
5491 mênscaðono megin. | Mahtig drohtin
5492 tholoda githuldion, | sô huat sô im thiu thioda deda.
5493 Sia hietun ina thuo fillian, | êr than sia im ferahes tuo,
5494 aldres âhtin, | endi im undar is ôgun spiuuun,
5495 dedun im that te hoske, | that sia mid iro handon slôgun,
5496 uueros an is uuangun | endi im is giuuâdi binâmun,
5497 rôb=odun ina thia reginscaðon, | rôdes lacanes
5498 dedun im eft ôðer an | thuru unhuldi;
5499 hietun thuo hôb=idband | hardaro thorno
5500 uuundron uuindan | endi an uualdand Crist
5501 selb=on settean, | endi gengun im thia gisîðos tuo,
5502 queddun ina an cuninguuîsu | endi thar an knio fellun,
5503 hnigun im mid iro hôb=du: | all uuas im that te hoske giduan,
5504 thoh hie it all githolodi, | thiodo drohtin,
5505 mahtig thuru thia minnia | manno cunnies.
5506 Hietun sia thuo uuirkian | uuâpnes eggion
5507 heliðos mid iro handon | hardes bômes
5508 craftiga crûci | endi hietun sia Cristan thuo,
5509 sâlig barn godes | selb=on fuorian,
5510 dragan hietun sia ûsan drohtin, | thar hie bedrôragad scolda
5511 sueltan sundiono lôs, | Sîðodun Iudeon,
5512 uueros an uuillon, | lêddun uualdand Crist,
5513 drohtin te dôðe. | Thar mohta man thuo dereb=i thing
5514 harmlîc gihôrian: | hiob=andi thar after
5515 gengun uuîf mid uuôpu, | uueros gnornodun,
5516 thia fan Galilea | mid im gangan quâmun,
5517 folgodun ob=ar ferruuegos: | uuas im iro frohon dôð
5518 suîðo an soragan. | Thuo hie selb=o sprak,
5519 barno that besta | endi under bac besah,
5520 hiet that sia ni uuêpin: | `ni tharf iu uuiht tregan,' quathie,
5521 'mînero hinferdio, | ac gi mid hofnu mugun
5522 iuuua uurêðan uuerc | uuôpu cûmian,
5523 tornon trahnon. | Noh uuirðið thiu tîd cuman,
5524 that thia muoder thes | mendendia sind,
5525 brûdi Iudeono, | them gio barn ni uuarð
5526 ôdan an aldre. | Than gi iuuua inuuid sculun
5527 grimmo angeldan; | than gi sô gerna sind,
5528 that iu hier bihlîdan | hôha bergos,
5529 diopo bedelb=an; | dôð uuâri iu than allon
5530 liob=era an theson lande | than sulic liudio qualm
5531 te githolianne, | sô hier than thesaro thioda cumid.'
[Fitt 66]
[Fitt index]