[Back to Fitt 63]
Fitt 64
5335 Thuo uuarð thie an forahton, | thie thes folkes giuueld,
5336 mikilon an is muode, | thuo hie gihôrda thia man sprecan.
5337 that sia ina selb=on | seggian gihôrdin,
5338 gehan fur them gumscipe, | that hie uuâri godes suno.
5339 Thuo huarf im eft thie heritogo | an that hûs innan
5340 te thero thingstedi, | thrîstion uuordon
5341 gruotta thena godes suno | endi frâgoda, huat hie gumono uuâri:
5342 `huat bist thu manno?' quathie. | `Te huî thu mi sô thînan muod hilis,
5343 dernis diopgithâht? | Uuêst thu that it all an mînon duome sted
5344 umbi thînes lîb=es gilagu? | Mi thi hebbiat thesa liudi fargeban,
5345 uuerod Iudeono, | thak ik giuualdan muot
5346 sô thik te spildianne | an speres orde,
5347 sô ti quellianne an crûcium, | sô quican lâtan,
5348 sô hueðer sô mi selb=on | suotera thunkit
5349 te gifrummianne mid mînu folcu.' | Thuo sprac eft that friðubarn godes:
5350 `uuêst thu that te uuâron,' quathie, | `that thu giuuald ob=ar mik
5351 hebbian ni mohtis, | ne uuâri that it thi hêlag god
5352 selb=o fargâb=i? | Oc hebbeat thia sundeono mêr,
5353 thia mik thi bifulhun | thuru fîondscipi,
5354 gisaldun an sîmon haftan.' | Thuo uuelda ina sîð after thiu
5355 gramhugdig man | gerno farlâtan,
5356 thegan kêsures, | thar hie is hab=di for thero thioda giuuald;
5357 ac sia uueridun im thena uuillion | uuordu gihuilicu,
5358 kunni Iudeono: | `ne bist thu,' quâðun sia, `thes kêsures friund,
5359 thînon hêrren hold, | ef thu ina hinan lâtis
5360 sîðon gisundon: | that thi noh te soragan mag,
5361 uuerðan te uuîte, | huand sô hue sô sulic uuord sprikit,
5362 ahab=ið ina sô hôho, | quiðit that hie hebbian mugi
5363 cuningduomes namon, | ne sî that ina im thie kêsur geb=e,
5364 hie uuirrid im is uueruldrîki | endi is uuord farhugid,
5365 farman ina an is muode. | Bethiu scalt thu sulic mên uurekan,
5366 hoscuuord manag, | ef thu umbi thînes hêrren ruokis,
5367 umbi thînes frôhon friundscipi, | than scalt thu ina thiu ferhu beniman.'
5368 Thuo gihôrda thie heritogo | thia hêri Iuðeono
5369 thrêgian fan is thiodne; | thuo hie far thero thingstedi geng
5370 selb=o gisittian, | thar gisamnod uuas
5371 sô mikil uuarf uuerodes, | hiet uualdand Crist
5372 lêdian for thia liudi. | Langoda Iudeon,
5373 huan êr sia that hêlaga barn | hangon gisâuuin,
5374 quelan an crûcie; sia quâðun that | sia cuning ôðran
5375 ne hab=din undar iro heriscipie, | neb=an thena hêran kêsar
5376 fan Rûmuburg: | `thie hab=it hier rîki ob=er ûs.
5377 Bethiu ni scalt thu thesan farlâtan; | hie hab=it ûs sô filo lêðes gisprokan,
5378 farduan hab=it hie im mid is dâdion. | Hie scal dôð tholon,
5379 uuîti endi uundarquâla.' | Uuerod Iudeono
5380 sô manag mislîc thing | an mahtigna Crist
5381 sagdun te sundiun. | Hie suîgondi stuod
5382 thuru ôðmuodi, | ne antuuordida niouuiht
5383 uuið iro uurêðun uuord: | uuolda thesa uuerold alla
5384 lôsian mid is lîb=u: | bithiu liet hie ina thia lêðun thiod
5385 uuêgian te uundron, | all sô iro uuillio geng:
5386 ni uuolda im opanlîco | allon cûðian
5387 Iudeo liudeon, | that hie uuas god selb=o;
5388 huand uuissin sia that te uuâron, | that hie sulica giuuald hab=di
5389 ob=ar theson middilgard, | than uurði im iro muodseb=o
5390 giblôðit an iro brioston: | than ne gidorstin sia that barn godes
5391 handon anthrînan: | than ni uuurði heb=anrîki,
5392 antlocan liohto mêst | liudio barnon.
5393 Bethiu mêð hie is sô an is muode, | ne lêt that manno folc
5394 uuitan, huat sia uuarahtun. | Thiu uurd nâhida thuo,
5395 mâri maht godes | endi middi dag,
5396 that sia thia ferahquâla | frummian scoldun.
5397 Than lag thar ôc an bendion | an thero burg innan
5398 ên ruof reginscaðo, | thie habda under them rîke sô filo
5399 morðes girâdan | endi manslahta gifrumid,
5400 uuas mâri meginthiof: | ni uuas thar is gimaco huergin;
5401 uuas thar ôc bi sînon | sundion giheftid,
5402 Barrabas uuas hie hêtan; | hie after them burgion uuas
5403 thuru is mêndâdi | manogon gicûðid.
5404 Than uuas landuuîsa | liudio Iudeono,
5405 that sia iâro gihuen | an godes minnia
5406 an them hêlagon dage | ênna haftan mann
5407 abiddian scoldun, | that im iro burges uuard,
5408 iro folctogo | ferah fargâb=i.
5409 Thuo bigan thie heritogo | thia hêri Iudeono,
5410 that folc frâgoian, | thar sia im fora stuodun,
5411 hueðeron sia thero tueio | tuomian uueldin,
5412 ferahes biddian: | `thia hier an feteron sind
5413 haft undar theson heriscipie?' | Thiu hêri Iudeono
5414 habdun thuo thia aramun man | alla gispanana,
5415 that sia themo landscaðen | lîf abâdin,
5416 githingodin them thiob=e, | thie oft an thiustria naht
5417 uuam giuuarahta, | endi uualdand Crist
5418 quelidin an crûcie. | Thuo uuarð that cûð ob=ar all,
5419 huô thiu thiod hab=da duomos adêlid. | Thuo scoldun sia thia dâd frummian,
5420 hâhan that hêlaga barn. | That uuarð them heritogen
5421 sîðor te sorgon, | that hie thia saca uuissa,
5422 that sia thuru nîðscipi | neriendon Crist,
5423 hatoda thiu hêri, | endi hie im hôrda te thiu,
5424 uuarahta iro uuillion: | thes hie uuîti antfeng,
5425 lôn an theson liohte | endi lang after,
5426 uuôi sîðor uuann, | sîðor hie thesa uuerold agaf.
[Fitt 65]
[Fitt index]