[Back to Fitt 5]
Fitt 6
427 Habda im the engil godes | al giuuîsid
428 torhtun têcnun, | that sie im tô selb=un,
429 te them godes barne | gangan mahtun,
430 endi fundun sân | folco drohtin,
431 liudeo hêrron. | Sagdun thô lof goda,
432 uualdande mid iro uuordun | endi uuîdo cûðdun
433 ob=ar thea berhtun burg, | huilic im thar biliði uuarð
434 fon heb=anuuanga | hêlag gitôgit,
435 fagar an felde. | That frî al biheld
436 an ira hugiskeftiun, | hêlag thiorna,
437 thiu magað an ira môde, | sô huat sô siu gihôrda thea mann sprecan.
438 Fôdda ina thô fagaro | frîho scâniosta,
439 thiu môdar thurh minnea | managaro drohtin,
440 hêlag himilisc barn. | Heliðos gisprâcun
441 an them ahtodon daga | erlos managa,
442 suîðo glauua gumon | mid thera godes thiornun,
443 that he Hêleand te namon | hebbean scoldi,
444 sô it the godes engil | Gabriel gisprac
445 uuâron uuordun | endi them uuîb=e gibôd,
446 bodo drohtines, | thô siu êrist that barn antfeng
447 uuânum te thesero uueroldi. | Uuas iru uuilleo mikil,
448 that siu ina sô hêlaglîco | haldan môsti,
449 fulgeng im thô sô gerno. | That gêr furðor skrêd,
450 untthat that friðubarn godes | fiartig habda
451 dago endi nahto. | Thô scoldun sie thar êna dâd frummean,
452 that sie ina te Hierusalem | forgeb=an scoldun
453 uualdanda te them uuîha. | Sô uuas iro uuîsa than,
454 thero liudeo landsidu, | that that ni môsta forlâtan negên
455 idis undar Ebreon, | ef iru at êrist uuarð
456 sunu afôdit, | ne siu ina simbla tharod
457 te them godes uuîha | forgeb=an scolda.
458 Giuuitun im thô thiu gôdun tuuê, | Ioseph endi Maria
459 bêðiu fon Bethleem: | habdun that barn mid im,
460 hêlagna Krist, | sôhtun im hûs godes
461 an Hierusalem; | thar scoldun sie is geld frummean
462 uualdanda at them uuîha | uuîsa lêstean
463 Iudeo folkes. | Thar fundun sea ênna gôdan man
464 aldan at them alaha, | aðalboranan,
465 the habda at them uuîha sô filu | uuintro endi sumaro
466 gilibd an them liohta: | oft uuarhta he thar lof goda
467 mid hluttru hugi; | habda im hêlagna gêst,
468 sâliglîcan seb=on; | Simeon uuas he hêtan.
469 Im habda giuuîsid | uualdandas craft
470 langa huîla, | that he ni môsta êr thit lioht ageb=an,
471 uuendean af thesero uueroldi, | êr than im the uuilleo gistôdi,
472 that he selb=an Krist | gisehan môsti,
473 hêlagna heb=ancuning. | Thô uuarð im is hugi suîðo
474 bliði an is briostun, | thô he gisah that barn cuman
475 an thena uuîh innan. Thuo sagda hie uualdande thanc,
476 almahtigon gode, | thes he ina mid is ôgun gisah.
477 Geng im thô tegegnes | endi ina gerno antfeng
478 ald mid is armun: | al antkende
479 bôcan endi biliði | endi ôc that barn godes,
480 hêlagna heb=ancuning, | `Nu ic thi, hêrro, scal', quað he
481 `gerno biddean, | nu ic sus gigamalod bium,
482 that thu thînan holdan scalc | nu hinan huerb=an lâtas,
483 an thîna friðuuuâra faran, | thar êr mîna forðrun dedun,
484 uueros fon thesero uueroldi, | nu mi the uuilleo gistôd,
485 dago liob=osto, | that ic mînan drohtin gisah,
486 holdan hêrron, | sô mi gihêtan uuas
487 langa huîla. | Thu bist lioht mikil
488 allun elithiodun, | thea êr thes alouualdon
489 craft ne antkendun. | Thîna cumi sindun
490 te dôma endi te diurðon, | drohtin frô mîn,
491 ab=arun Israhelas, | êganumu folke,
492 thînun liob=un liudiun.' | Listiun talde thô
493 the aldo man an them alaha | idis thero gôdun,
494 sagda sôðlîco, | huô iro sunu scolda
495 ob=ar thesan middilgard | managun uuerðan
496 sumun te falle, sumun te frôb=ru | firiho barnun,
497 them liudiun te leob=a, | the is lêrun gihôrdin,
498 endi them te harma, | the hôrien ni uueldin
499 Kristas lêron. | `Thu scalt noh', quað he, `cara thiggean,
500 harm an thînumu herton, | than ina heliðo barn
501 uuâpnun uuîtnod. | That uuirðid thi uuerk mikil,
502 thrim te githolonna.' | Thiu thiorna al forstôd
503 uuîsas mannas uuord. | Thô quam thar ôc ên uuîf gangan
504 ald innan them alaha: | Anna uuas siu hêtan,
505 dohtar Fanueles; | siu habde ira drohtine uuel
506 githionod te thanca, | uuas iru githungan uuîf.
507 Siu môsta aftar ira magaðhêdi, | sîðor siu mannes uuarð,
508 erles an êhti | eðili thiorne,
509 sô môsta siu mid ira brûdigumon | bôdlo giuualdan
510 sib=un uuintar saman. | Thô gifragn ic that iru thar sorga gistôd
511 that sie thiu mikila maht | metodes tedêlda,
512 uurêð uurdigiscapu. | Thô uuas siu uuidouua aftar thiu
513 at them friðuuuîha | fior endi antahtoda
514 uuintro an iro uueroldi, | sô siu nia thana uuîh ni forlêt,
515 ac siu thar ira drohtine uuel | dages endi nahtes,
516 gode thionode. | Siu quam thar ôc gangan tô
517 an thea selb=un tîd: | sân antkende
518 that hêlage barn godes | endi them heliðon cûðde,
519 them uueroda aftar them uuîha | uuilspel mikil,
520 quað that im neriandas ginist | ginâhid uuâri,
521 helpa heb=encuninges: | `nu is the hêlago Krist,
522 uualdand selb=o | an thesan uuîh cuman
523 te alôsienne thea liudi, | the hêr nu lango bidun
524 an thesara middilgard, | managa huuîla,
525 thurftig thioda, | sô nu thes thinges mugun
526 mendian mancunni.' | Manag fagonoda
527 uuerod aftar them uuîha: | gihôrdun uuilspel mikil
528 fon gode seggean. | That geld habde thô gilêstid
529 thiu idis an them alaha, | al sô it im an ira êuua gibôd
530 endi an thera berhtun burg | bôk giuuîsdun,
531 hêlagaro handgiuuerk. | Giuuitun im thô te hûs thanan
532 fon Hierusalem | Ioseph endi Maria,
533 hêlag hîuuiski: | habdun im heb=enkuning
534 simbla te gisîða, | sunu drohtines,
535 managaro mundboron, | sô it gio mâri ni uuarð
536 than uuîdor an thesaro uueroldi, | bûtan sô is uuilleo geng,
537a heb=encuninges hugi. |
[Fitt 7]
[Fitt index]