[Back to Fitt 54]
Fitt 55
4525b Friðubarn godes
4526 geng imu thô eft gisittien | under that gesîðo folc
4527 endi im sagda filu langsamna râd. | Uuarð eft lioht kuman,
4528 morgen te mannun. | Mahtigne Crist
4529 grôttun is iungaron | endi frâgodun, huar sie is gôma thô
4530 an themu uuîhdage | uuirkien scoldin,
4531 huar he uueldi halden | thea hêlagon tîdi
4532 selb=o mid is gesîðun, | Thô he sie sôkien hêt,
4533 thea gumon Hierusalem: | `sô gi than gangan kumad,' quað he,
4534 `an thea burg innan | -- thar is braht mikil,
4535 meginthiodo gimang --, | thar mugun gi ênan man sehan
4536 an is handun dragen | hluttres uuatares
4537 ful mid folmun, | Themu gi folgon sculun
4538 an sô huilike gardos, | sô gi ina gangan gisehat,
4539 ia gi than themu hêrron, | the thie hob=os êgi,
4540 selb=on seggiad, | that ik iu sende tharod
4541 te gigaruuuenne mîna gôma. | Than tôgid he iu ên gôdlîc hûs,
4542 hôhan soleri, | the is bihangen al
4543 fagarun fratahun. | Thar gi frummien sculun
4544 uuerdscepi mînan. | Thar bium ik uuiskumo
4545 selb=o mid mînun gesîðun.' | Thô uurðun sân aftar thiu
4546 thar te Hierusalem | iungaron Kristes
4547 forðuuard an ferdi, | fundun all sô he sprak
4548 uuordtêcan uuâr: | ni uuas thes giuuand ênig.
4549 Thar gereuuidun sie thea gôma. | Uuarð the godes sunu,
4550 hêlag drohtin | an that hûs cuman,
4551 thar sie the landuuîse | lêstien scoldun,
4552 fulgangan godes gibode, | al sô Iudeono uuas
4553 êo endi aldsidu | an êrdagun.
4554 Giuuêt imu thô an themu âb=ande | alouualdand Krist
4555 an thene seli sittien; | hêt thar is gesîðos te imu
4556 tuelib=i gangan, | thea im gitriuuiston
4557 an iro môdseb=on | manno uuârun
4558 bi uuordun endi bi uuîsun: | uuisse imu selb=o
4559 iro hugiskefti | hêlag drohtin.
4560 Grôtte sie thô ob=ar them gômun: | `gern bium ik suîðo,' quað he,
4561 'that ik samad mid iu | sittien môti,
4562 gômono neoten, | Iudeono pascha
4563 dêlien mid iu sô diuriun. | Nu ik iu iuuues drohtines scal
4564 uuilleon seggian, | that ik an thesaro uueroldi ni môt
4565 mid mannun mêr | môses anbîten
4566 furður mid firihun, | êr than gifullod uuirðid
4567 himilo rîki. | Mi is an handun nu
4568 uuîti endi uunderquâle, | thea ik for thesumu uuerode scal,
4569 tholon for thesaru thiodu.' | Sô he thô sô te them thegnun sprak,
4570 hêlag drohtin, | sô uuarð imu is hugi drôb=i,
4571 uuarð imu gisuorken seb=o, | endi eft te them gesîðun sprac,
4572 the gôdo te them is iungarun: | `huat, ik iu godes rîki,' quað he,
4573 `gihêt himiles lioht, | endi gi mi holdlîco
4574 iuuuan theganskepi. | Nu ni uuilliat gi athengean sô,
4575 ac uuenkeat thero uuordo. | Nu seggiu ik iu te uuâran hêr,
4576 that uuili iuuuar tuelib=io ên | treuuana suîkan,
4577 uuili mi farcôpon | undar thit kunni Iudeono,
4578 gisellien uuiðer silub=re, | endi uuili imu thar sinc niman,
4579 diurie mêðmos, | endi geb=en is drohtin uuið thiu,
4580 holdan hêrran. | That imu thoh te harme scal,
4581 uuerðan te uuîtie; | be that he thea uurdi farsihit
4582 endi he thes arb=edies | endi scauuot,
4583 than uuêt he that te uuâran, | that imu uuâri uuôðiera thing,
4584 betera mikilu, | that he gio giboran ni uurði
4585 libbiendi te thesumu liohte, | than he that lôn nimid,
4586 ub=il arb=edi | inuuidrâdo.'
4587 Thô bigan thero erlo gehuilic | te ôðrumu scauuon,
4588 sorgondi sehan; | uuas im sêr hugi,
4589 hriuuig umbi iro herta: | gihôrdun iro hêrron thô
4590 gornuuord sprekan. | Thea gumon sorgodun,
4591 huilican he thero | tuelib=io te thiu tellien uueldi,
4592 sculdigna scaðon, | that he habdi thea scattos thar
4593 gethingod at theru thiod. | Ni uuas thero thegno ênigumu
4594 sulikes inuuiddies | ôði te gehanne,
4595 mêngithâhtio | --antsuok thero manno gehuilic --,
4596 uurðun alle an forhtun, | frâgon ne gidorstun,
4597 êr than thô gebôknide | baruuirðig gumo,
4598 Sîmon Petrus | -- ne gidorste it selb=o sprekan --
4599 te Iohanne themu gôdon: | he uuas themu godes barne
4600 an them dagun | thegno liob=ost,
4601 mêst an minniun | endi môste thar thô an thes mahtiges Kristes
4602 barme restien | endi an is breostun lag,
4603 hlinode mid is hôb=du: | thar nam he sô manag hêlag gerûni,
4604 diapa githâhti, | endi thô te is drohtine sprac,
4605 began ina thô frâgon: ` | hue scal that, frô mîn, uuesen,' quað he,
4606 'that thi farcôpon uuili, | cuningo rîkeost,
4607 undar thînaro fîundo folc? | Ûs uuâri thes firiuuit mikil,
4608 uualdand, te uuitanne.' | Thô habde eft is uuord garu
4609 hêleando Crist: | `seh thi, huemu ik hêr an hand geb=e
4610 mînes môses for thesun mannun: | the hab=ed mêngithâht,
4611 birid bittran hugi; | the scal mi an banono geuuald,
4612 fîundun bifelhen, | thar man mînes ferhes scal,
4613 aldres âhtien.' | Nam he thô aftar thiu
4614 thes môses for them mannun | endi gaf is themu mênscaðen,
4615 Iudase an hand | endi imu tegegnes sprac
4616 selb=o for them is gesîðun | endi ina sniumo hêt
4617 faran fan themu is folke: | `frumi sô thu thenkis,' quað he,
4618 'dô that thu duan scalt: | thu ni maht bidernien leng
4619 uuilleon thînan. | Thiu uurd is at handun,
4620 thea tîdi sind nu ginâhid,' | Sô thô the treulogo
4621 that môs antfeng | endi mid is mûðu anbêt,
4622 sô afgaf ina thô thiu godes craft, | gramon in geuuitun
4623 an thene lîchamon, | lêða uuihti,
4624 uuarð imu Satanas | sêro bitengi,
4625 hardo umbi is herte, | sîður ine thiu helpe godes
4626 farlêt an thesumu liohte. | Sô is thena liudio uuê,
4627 the sô undar thesumu himile scal | hêrron uuehslon.
[Fitt 56]
[Fitt index]