[Back to Fitt 48]

Fitt 49

4025 Thô them uuîbun uuas | uuilleono mêsta
4026 cumi drohtines | endi Cristes uuord
4027 te gihôrienne. | Heob=andi geng
4028 Martha môdkarag | uuið sô mahtigne
4029 uuordun uuehslan | endi uuið uualdand sprak
4030 an iro hugi hriuuig: | `thar thu mi, hêrro mîn,' quað siu,
4031 `neriendero bezt, | nâhor uuâris,
4032 hêleand the gôdo, | than ni thorfti ik nu sulic harm tholon,
4033 bittra breostkara, | than ni uuâri nu mîn brôd=er dôd,
4034 Lazarus fan thesumu liohte, | ac he imu mahti libbien forð
4035 ferahes gefullid. | Ik thoh, frô mîn, te thi
4036 liohto gilôb=iu, | lêriandero bezt,
4037 sô hues sô thu biddien uuili | berhton drohtin,
4038 that he it thi sân fargib=id, | god alomahtig,
4039 giuuerðot thînan uuillean.' | Thô sprak eft uualdand Krist
4040 theru idis anduuordi: | `ni lât thu thi an innan thes,' quað he,
4041 `thînan seb=on suerkan: | ik thi seggian mag
4042 uuârun uuordun, | that thes nis giuuand ênig,
4043 neb=u thîn brôðer scal | thurh gibod godes,
4044 thurh drohtines craft | fan dôd=e astanden
4045 an is lîchamon.' | `All hebbiu ik gilôb=on sô,' quað siu,
4046 `that it sô giuuerðen scal, | sô huan sô thius uuerold endiod
4047 endi the mâreo dag | ob=ar man ferid,
4048 that he than fan erðu scal | up astanden
4049 an themu dômes daga, | than uuerðad fan dôd=e quica
4050 thurh maht godes | mankunnies gehuilic,
4051 arîsad fan restu.' | Thô sagde rîkeo Krist
4052 theru idis alomahtig | oponun uuordun,
4053 that he selb=o uuas | sunu drohtines,
4054 bêðiu ia liYia lioht | liudio barnon
4055 te astandanne: | `nio the sterb=en ni scal,
4056 lîf farliosen, | the hêr gilôb=id te mi:
4057 thoh ina eldibarn | erðu bithekkien,
4058 diapo bidelb=en, | nis he dôd thiu mêr:
4059 that flêsk is bifolhen, | that ferah is gihalden,
4060 is thiu siola gisund.' | Thô sprak imu eft sân angegin
4061 that uuîf mid iro uuordun: | `ik gilôb=iu that thu the uuâro bist,' quað siu,
4062 `Krist godes sunu: | that mag man antkennien uuel,
4063 uuiten an thînun uuordun, | that thu giuuald hab=es
4064 thurh thiu hêlagon giscapu | himiles endi erðun.'
4065 Thô gefragn ik that thar thero idisio quam | ôðar gangan
4066 Maria môdkarag: | gengun iro managa aftar
4067 Iudeo liudi. | Thô siu themu godes barne
4068 sagde sêragmôd, | huat iru te sorgun gistôd
4069 an iro hugi harmes: | hofnu kûmde
4070 Lazaruses farlust, | liab=es mannes,
4071 griat gornundi, | antat themu godes barne
4072 hugi uuarð gihrôrid: | hête trahni
4073 uuôpu auuellun, | endi thô te them uuîb=un sprac,
4074 hêt ina thô lêdien, | thar Lazarus uuas
4075 foldu bifolhen. | Lag thar ên felis biob=an,
4076 hard stên behliden. | Thô hêt the hêlago Crist
4077 antlûcan thea lêia, | that he môsti that lîk sehan,
4078 hrêo scauuoien. | Thô ni mahte an iro hugi mîðan
4079 Martha for theru menegi, | uuið mahtigne sprak:
4080 `frô mîn the gôdo,' quað siu, | `ef man thene felis nimid,
4081 thene stên antlûkid, | than uuâniu ik that thanen stank kume,
4082 unsuôti suek, | huand ik thi seggian mag
4083 uuârun uuordun, | that thes nis giuuand ênig,
4084 that he thar nu bifolhen uuas | fiuuuar naht endi dagos
4085 an themu erðgrab=e.' | Anduuordi gaf
4086 uualdand themu uuîbe: | `huat, ni sagde ik thi te uuârun êr,' quað he,
4087 `ef thu gilôb=ien uuili, | than nis nu lang te thiu,
4088 that thu hêr antkennien scalt | craft drohtines,
4089 the mikilon maht godes?' | Thô gengun manage tô,
4090 afhôb=un harden stên. | Thô sah the hêlago Crist
4091 up mid is ôgun, | ôlat sagde
4092 themu the these uuerold giscôp, | `thes thu mîn uuord gihôris,' quað he,
4093 `sigidrohtin selb=o; | ik uuêt that thu sô simlun duos,
4094 ac ik duom it be thesumu grôton | Iudeono folke,
4095 that sie that te uuârun uuitin, | that thu mi an these uuerold sendes
4096 thesun liudiun te lêrun.' | Thô he te Lazaruse hriop
4097 starkaru stemniu | endi hêt ina standen up
4098 ia fan themu grab=e gangan. | Thô uuarð the gêst kumen
4099 an thene lîchamon: | he bigan is liði hrôrien,
4100 antuuarp undar themu giuuêdie: | uuas imo sô beuunden thô noh,
4101 an hrêobeddion bihelid. | Hêt imu helpen thô
4102 uualdandeo Krist. | Uueros gengun tô,
4103 antuundun that geuuâdi. | Uuânum up arês
4104 Lazarus te thesumu liohte: | uuas imu is lîf fargeb=en,
4105 that he is aldarlagu | êgan môsti,
4106 friðu forðuuardes. | Thô fagonadun bêðea,
4107 Maria endi Martha: | ni mag that man ôðrumu
4108 giseggian te sôðe, | huô thea gesuester tuô
4109 mendiodun an iro môde. | Maneg uundrode
4110 Iudeo liudio, | thô sie ina fan themu grab=e sâhun
4111 sîðon gesunden, | thene the êr suht farnam
4112 endi sie bidulb=un | diapo undar erðu
4113 lîb=es lôsen: | thô môste imu libbien forð
4114 hêl an hêmun. | Sô mag heb=enkuninges,
4115 thiu mikile maht godes | manno gehuilikes
4116 ferahe giformon | endi uuið fîundo nîd=
4117 hêlag helpen, | sô huemu sô he is huldi fargib=id.
[Fitt 50] [Fitt index]