[Back to Fitt 46]
Fitt 47
3840 Sie ni uueldun it thoh farlâten, | ac hêtun thar lêdien forð
3841 ên uuîf for themu uuerode, | thiu habde uuam gefrumid,
3842 unreht ênfald: | thiu idis uuas bifangen
3843 an farlegarnessi, | uuas iro lîb=es scolo,
3844 that sie firiho barn | ferahu binâmin,
3845 êhtin iro aldres: | sô uuas an iro êu gescrib=en.
3846 Sie bigunnun ina thô frâgon, | fruokne liudi,
3847 uurêða mid iro uuordun, | huat sie scoldin themu uuîb=e duan,
3848 hueðer sie sie quelidin, | the sie sie quica lêtin,
3849 the huat he umbi sulica dâdi | adêlien uueldi:
3850 `thu uuêst, huô thesaru menegi,' quâðun sie, ` | Moyses gibôd
3851 uuârun uuordun, | that allaro uuîb=o gehuilic
3852 an farlegarnessi | lîb=es faruuarhti
3853 endi that sie than auurpin | uueros mid handun,
3854 starkun stênun: | nu maht thu sie sehan standen hêr
3855 an sundiun bifangan: | saga huat thu is uuillies.'
3856 Uueldun ine thea uuiðersakon | uuordun farfâhen,
3857 ef he that giquâði, | that sie sie quica lêtin,
3858 friðodi ira ferahe, | than uueldi that folc Iudeono
3859 queðen, that he iro aldiron | êo uuiðersagdi,
3860 thero liudio landreht; | ef he sie than hêti lîb=u binimen,
3861 thea magað fur theru menegi, | than uueldin sie queðen, that he sô mildiene hugi
3862 ni bâri an is breostun, | sô scoldi habbien barn godes:
3863 uueldun sie sô hueðeres | hêlagne Crist
3864 thero uuordo geuuîtnon, | sô he thar for themu uuerode gesprâki,
3865 adêldi te dôme, | Than uuisse drohtin Krist
3866 thero manno sô garo | môdgithâhti,
3867 iro uurêðon uuilleon; | thô he te themu uuerode sprak,
3868 te allun them erlun: | `sô huilik sô iuuuar âno sî,' quað he,
3869 `slîðea sundeon, | sô ganga iru selb=o tô
3870 endi sie at êrist | erl mid is handun
3871 stên ana uuerpe.' | Sô stôdun Iudeon,
3872 thâhtun endi thagodun: | ni mahte thegan nigiean
3873 uuið them uuordquidi | uuiðersaca finden:
3874 gehugde manno gehuilic | mêngithâhti,
3875 is selb=es sundea: | ni uuas iro sô sikur ênig,
3876 that he bi themu uuorde | themu uuîb=e gedorsti
3877 stên an uuerpen, | ac lêtun sie standen thar
3878 ênan thar inne | endi im ût thanen
3879 gengun gramharde | Iudeo liudi,
3880 ên aftar ôðrumu, | antat iro thar ênig ni uuas
3881 thes fîundo folkes, | the iro ferhes thô,
3882 theru idis aldarlago | âhtien uueldi.
3883 Thô gifragn ik that sie frâgode | friðubarn godes,
3884 allaro gumono bezt: ` | huar quâmun thit Iudeono folc,' quað he,
3885 `thine uuiðersakon, | thea thi hêr uurôgdun te mi?
3886 Ne sie thi hiudu uuiht | harmes ne gidâdun,
3887 thea liudi lêðes, | the thi uueldun lîb=u beniman,
3888 uuêgean te uundrun?' | Thô sprak imu eft that uuîf angegin,
3889 quað that iru thar nioman | thurh thes neriandan
3890 hêlaga helpa | harm ne gifrumidi
3891 uuammes te lône. | Thô sprak eft uualdand Crist,
3892 drohtin manno: | `ne ik thi geth ni deriu neouuiht,' quað he,
3893 `ac gang thi hêl hinen, | lât thi an thînumu hugi sorga,
3894 that thu nio sîð aftar thius | sundig ni uuerðes.'
3895 Habde iru thô giholpen | hêlag barn godes,
3896 gefriðot iro ferahe, | Than stôd that folc Iudeono
3897 ub=iles anmôd | sô fan êristan,
3898 uurêðes uuillean, | huô sie uuordheti
3899 uuið that friðubarn godes | frummien môstin.
3900 Habdun thea liudi an tuê | mid iro gilôb=on gifangan:
3901 uuas thiu smale thioda | sînes uuillean
3902 gernora mikilu, | thes godes barnes uuord
3903 te gefrummienne, | sô im iro frâho gibôd:
3904 rômodun te rehta | bet than thie rîkeon man,
3905 habdun ina far iro hêrron | ia far heb=encuning,
3906 fulgengun imu gerno. | Thô giuuêt imu the godes sunu
3907 an thene uuîh innan: | huarf ina uuerod umbi,
3908 meginthiodo gimang. | He an middien stôd,
3909 lêrde thea liudi | liohtun uuordun,
3910 hlûdero stemnun: | uuas hlust mikil,
3911 thagode thegan manag, | endi he theru thiod gibôd,
3912 sô hue sô thar mid thurstu | bithuungan uuâri,
3913 `sô ganga imu herod drincan te mi,' quað he, | `dago gehuilikes
3914 suôties brunnan. | Ik mag seggian iu,
3915 sô hue sô hêr gilôb=id te mi | liudio barno
3916 fasto undar thesumu folke, | that imu than flioten sculun
3917 fan is lîchamon | libbiendi flôd,
3918 irnandi uuater, | ahospring mikil,
3919 kumad thanen quica brunnon. | Thesa quidi uuerðad uuâra,
3920 liudiun gilêstid, | sô huemu sô hêr gilôb=id te mi.'
3921 Than mênde mid ehiu uuataru | uualdandeo Crist,
3922 hêr heb=encuning | hêlagna gêst,
3923 huô thene firiho barn | antfâhen scoldin,
3924 lioht endi listi | endi lîf êuuig,
3925 hôh heb=enrîki | endi huldi godes.
[Fitt 48]
[Fitt index]