[Back to Fitt 43]
Fitt 44
3588b Thar uuas sô mahtiglîc
3589 biliði gibôknid, | thar the blindon man
3590 bi themu uuege sâtun, | uuîti tholodun,
3591 liohtes lôse: | that mênid thoh liudio barn,
3592 al mancunni, | huô sie mahtig god
3593 an themu anaginne | thurh is ênes craft
3594 sinhîun tuê | selb=o giuuarhte,
3595 Adam endi Evan: | fargaf im upuuegos,
3596 himilo rîki; | ac thô uuarð im the hatola te nah,
3597 fîund mid fêknu | endi mid firinuuerkun,
3598 bisuêk sie mid sundiun, | that sie sinscôni,
3599 lioht farlêtun: | uurðun an lêðaron stedi,
3600 an thesen middilgard | man faruuorpen,
3601 tholodun hêr an thiustriu | thiodarb=edi,
3602 uunnun uuracsîðos, | uuelon tharb=odun:
3603 fargâtun godes rîkies, | gramon theonodun,
3604 fîundo barnun; | sie guldun is im mid fiuru lôn
3605 an theru hêton helliu. | Bethiu uuârun siu an iro hugi blinda
3606 an thesaru middilgard, | menniscono barn,
3607 huand siu ine ni antkiendun, | craftagne god,
3608 himilisken hêrron, | thene the sie mid is handun giscôp,
3609 giuuarhte an is uuillion. | Thius uuerold uuas thô sô farhuerb=id,
3610 bithuungen an thiustrie, | an thiodarb=idi,
3611 an dôðes dalu: | sâtun im thô bi theru drohtines strâtun
3612 iâmarmôde, | godes helpe bidun:
3613 siu ni mahte im thô êr uuerðen, | êr than uualdand god
3614 an thesan middilgard, | mahtig drohtin,
3615 is selb=es sunu | sendien uueldi
3616 that he lioht antluki | liudio barnun,
3617 oponodi im êuuig lîf, | that sie thene alouualdon
3618 mahtin antkennien uuel, | craftagna god.
3619 Ok mag ik giu gitellien, | of gi thar tô uuilliad
3620 huggien endi hôrien, | that gi thes hêliandes mugun
3621 craft antkennien, | huô is kumi uurðun
3622 an thesaru middilgard | managun te helpu,
3623 ia huat he mid them dâdiun | drohtin selb=o
3624 manages mênde, | ia behuiu thiu mârie burg
3625 Hiericho hêtid, | thiu thar an Iudeon stâd
3626 gimacod mid mûrun: | thiu is aftar themu mânen ginemnid,
3627 aftar themu torhten tungle: | he ni mag is tîdi bemîðen,
3628 ac he dago gehuilikes | duod ôðerhueðer,
3629 uuanod ohtho uuahsid, | Sô dôd an thesaro uueroldi hêr,
3630 an thesaru middilgard | menniscono barn:
3631 farad endi folgod, | frôde sterb=ad,
3632 uuerðad eft iunga | aftar kumane,
3633 uueros auuahsane, | unttat sie eft uurd farnimid.
3634 That mênde that barn godes, | thô he fon theru burgi fôr,
3635 the gôdo fan Hiericho, | that ni mahte êr uuerðen gumono barnun
3636 thiu blindia gibôtid, | that sie that berhte lioht,
3637 gisâhin sinscôni, | êr than he selb=o hêr
3638 an thesaru middilgard | menniski antfeng,
3639 flêsk endi lîchamon. | Thô uurðun thes firiho barn
3640 giuuar an thesaru uueroldi, | the hêr an uuîtie êr,
3641 sâtun an sundiun | gisiunies lôse,
3642 tholodun an thiustrie, | -- sie afsôb=un that uuas thesaru thiod kuman
3643 hêleand te helpu | fan heb=enrîkie,
3644 Crist allaro cuningo best; | sie mahtun is antkennien sân,
3645 gifôlien is fardio. | Thô sie sô filu hriopun,
3646 the man te themu mahtigon gode, | that im mildi aftar thiu
3647 uualdand uurði. | Than uueridun im suîðo
3648 thia suârun sundeon, | the sie im êr selb=on gidâdun,
3649 lettun sie thes gilôbon. | Sie ni mahtun them liudiun thoh
3650 biuuerien iro uuilleon, | ac sie an uualdand god
3651 hlûdo hriopun, | antat he im iro hêli fargaf,
3652 that sie sinlîf | gisehen môstin,
3653 open êuuig lioht | endi an faren
3654 an thiu berhtun bû. | That mêndun thea blindun man,
3655 the thar bi Hierichoburg | te themu godes barne
3656 hlûdo hriopun, | that he im iro hêli farlihi,
3657 liohtes an thesumu lîb=e: | than im thea liudi sô filu
3658 uueridun mid uuordun, | thea thar an themu uuege fôrun
3659 biforen endi bihinden: | sô dôt thea firinsundeon
3660 an thesaru middilgard | mankunnie.
3661 Hôriad nu huô thie blindun, | sîður im gibôtid uuarð,
3662 that sie sunnun lioht | gesehen môstun,
3663 huô si thô dâdun: | geuuitun im mid iro drohtine samad,
3664 folgodun is ferdi, | sprâkun filu uuordo
3665 themu landes hirdie te lob=e: | sô dôd im noh liudio barn
3666 uuîdo aftar thesaru uueroldi, | sîður im uualdand Crist
3667 geliuhte mid is lêrun | endi im lîf êuuig,
3668 godes rîki fargaf | gôdun mannun,
3669 hôh himiles lioht | endi is helpe thar tô,
3670 sô huemu sô that giuuerkod, | that he môti themu is uuege folgon.
[Fitt 45]
[Fitt index]