[Back to Fitt 39]

Fitt 40

3223b Sô lêrde the hêlago Crist
3224 thea is gôdon iungaron: ` | ef ênig gumono uuið iu,' quað he,
3225 `sundea geuuirkea, | than nim thu ina sundar te thi,
3226 thene rink an rûna | endi imu is râd saga,
3227 uuîsi imu mid uuordun. | Ef imu than thes uuerð ne sî,
3228 that he thi gihôrie, | hala thi thar ôðara tô
3229 gôdaro gumono, | endi lah imu is grimmun uuerc,
3230 sak ina sôðuuordun. | Ef imu than is sundea aftar thiu,
3231 lôsuuerc ni lêðon, | giduo it ôðrun liudiun cûð,
3232 mâri it than for menegi | endi lât manno filu
3233 uuiten is faruurhti: | ôðo beginnad imu than is uuerk tregan,
3234 an is hugi hreuuen, | than he it gihôrid heliðo filu,
3235 ahton eldibarn | endi imu is ub=ilon dâd
3236 uueread mid uuordun. | Ef he than ôk uuendien ne uuili,
3237 ac farmôdat sulica menegi, | than lât thu thene man faren,
3238 hab=a ina than far hêðinen | endi lât ina thi an thînumu hugi lêðen,
3239 mîð is an thînumu môde, | ne sî that imu eft mildi god,
3240 hêr heb=encuning | helpe farlîhe,
3241 fader allaro firiho barno.' | Thô frâgode Petrus,
3242 allaro thegno bezt | theodan sînan:
3243 `huô oft scal ik them mannun, | the uuið mi habbiad
3244 lêðuuerk giduan, | leob=o drohtin,
3245 scal ik im sib=un sîðun | iro sundea alâten,
3246 uurêðaro uuerko, | êr than ik is êniga uurêka frummie,
3247 lêðes te lône?' | Thô sprak eft the landes uuard,
3248 angegin the godes sunu | gôdumu thegne:
3249 'ni seggiu ik thi fan sib=uniun, | sô thu selb=o sprikis,
3250 mahlis mid thînu mûðu, | ik duom thi mêra thar tô:
3251 sib=un sîðun sib=untig | sô scalt thu sundea gehuemu,
3252 lêðes alâten: | sô uuilliu ik thi te lêrun geb=en
3253 uuordun uuârfastun. | Nu ik thi sulica giuuald fargaf,
3254 that thu mînes hîuuiskes | hêrost uuâris,
3255 manages mannkunnies, | nu scalt thu im mildi uuesen,
3256 liudiun lîði.' | Thô thar te themu lêreande quam
3257 ên iung man angegin | endi frâgode Iesu Crist:
3258 `mêster the gôdo,' quað he, | `huat scal ik manages duan,
3259 an thiu the ik heb=enrîki | gehalan môti?'
3260 Habde imu ôduuelon | allen geuunnen,
3261 mêðomhord manag, | thoh he mildean hugi
3262 bâri an is breostun. | Thô sprak imu that barn godes:
3263 `huat quiðis thu umbi gôdon? | nis that gumono ênig
3264 biûtan the êno, | the thar al gescôp,
3265 uuerold endi uunnea. | Ef thu is uuillean hab=as,
3266 that thu an lioht godes | lîðan môtis,
3267 than scalt thu bihalden | thea hêlagon lêra,
3268 the thar an themu aldon | êuua gebiudid,
3269 that thu man ni slah, | ni thu mênes ni sueri,
3270 farlegarnessi farlât | endi luggi geuuitskepi,
3271 strîd endi stulina; | ne uuis thu te stark an hugi,
3272 ne nîðin ne hatul, | ni nôdrôf ni fremi;
3273 ab=unst alla farlât; | uuis thînun eldirun gôd,
3274 fader endi moder, | endi thînun friundun hold,
3275 them nâhistun ginâðig. | Than thu thi giniodon môst
3276 himilo rîkeas, | ef thu it bihalden uuili,
3277 fulgangan godes lêrun.' | Thô sprak eft the iungo man
3278 `al hebbiu ik sô gilêstid,' quað he, | `sô thu mi lêris nu,
3279 uuordun uuîsis, | sô ik is eo uuiht ni farlêt
3280 fan mînero kindiski.' | Thô bigan ina Crist sehan
3281 an mid is ôgun: | `ên is thar noh nu,' quað he,
3282 `uuan thero uuerko: | ef thu is uuilleon hab=as,
3283 that thu thurhfremid | thionon môtis
3284 hêrron thînumu, | than scalt thu that thîn hord nimen,
3285 scalt thînan ôduuelon | allan farcôpien,
3286 diurie mêðmos, | endi dêlien hêt
3287 armun mannun: | than hab=as thu aftar thiu
3288 hord an himile; | cum thi than gihalden te mi,
3289 folgo thi mînaro ferdi: | than hab=as thu friðu sîður.'
3290 Thô uurðun Kristes uuord | kindiungumu manne
3291 suîðo an sorgun, | uuas imu sêr hugi,
3292 môd umbi herte: | habde mêðmo filu,
3293 uuelono geuunnen; | uuende imu eft thanen,
3294 uuas imu unôðo | innan breostun,
3295 an is seb=on suâro, | Sah imu aftar thô
3296 Krist alouualdo, | quað it thô, thar he uuelde,
3297 te them is iungarun geginuuardun, | that uuâri an godes rîki
3298 unôði ôdagumu manne | up te cumanne:
3299 'ôður mag man olbundeon, | thoh he sî unmet grôt,
3300 thurh nâðlan gat, | thoh it sî naru suîðo,
3301 sâftur thurhslôpien, | than mugi cuman thiu siole te himile
3302 thes ôdagan mannes, | the hêr al hab=ad
3303 giuuendid an thene uueroldscat | uuilleon sînen,
3304 môdgithâhti, | endi ni hugid umbi thie maht godes.'
[Fitt 41] [Fitt index]