[Back to Fitt 36]
Fitt 37
3057 thu bist the uuâro | uualdandes sunu,
3058 libbiendes godes, | the thit lioht giscôp,
3059 Crist cuning êuuig: | sô uuilliad uui queðen alle,
3060 iungaron thîne, | that thu sîs god selb=o,
3061 hêleandero bezt.' | Thô sprac imu eft is hêrro angegin:
3062 'sâlig bist thu Sîmon,' quað he, 'sunu lonases; | ni mahtes thu that selb=o gehuggean,
3063 gimarcon an thînun môdgithâhtiun, | ne it ni mahte thi mannes tunge
3064 uuordun geuuîsien, | ac dede it thi uualdand selb=o,
3065 fader allaro firiho barno, | that thu sô forð gisprâki,
3066 sô diapo bi drohtin thînen. | Diurlîco scalt thu thes lôn antfâhen,
3067 hluttro hab=as thu an thînan hêrron gilôb=on, | hugiskefti sind thîne stêne gelîca,
3068 sô fast bist thu sô felis the hardo; | hêten sculun thi firiho barn
3069 sancte Pêter: | ob=ar themu stêne scal man mînen seli uuirkean,
3070 hêlag hûs godes; | thar scal is hîuuiski tô
3071 sâlig samnon: | ni mugun uuið them thînun suîðeun crafte
3072 anthebbien hellie portun. | Ik fargib=u thi himilrîceas slutilas,
3073 that thu môst aftar mi | allun giuualdan
3074 kristinum folke; | kumad alle te thi
3075 gumono gêstos; | thu hab=e grôte giuuald,
3076 huene thu hêr an erðu | eldibarno
3077 gebinden uuillies: | themu is bêðiu giduan,
3078 himilrîki biloken, | endi hellie sind imu opana,
3079 brinnandi fiur; | sô huene sô thu eft antbinden uuili,
3080 antheftien is hendi, | themu is himilrîki,
3081 antloken liohto mêst | endi lîf êuuig,
3082 grôni godes uuang, | Mid sulicaru ik thi geb=u uuilliu
3083 lônon thînen gilôb=on. | Ni uuilliu ik, that gi thesun liudiun noh,
3084 mârien thesaru menigi, | that ik bium mahtig Crist,
3085 godes êgan barn. | Mi sculun Iudeon noh,
3086 unsculdigna | erlos binden,
3087 uuêgean mi te uundrun | -- dôt mi uuîties filo--
3088 innan Hierusalem | gêres ordun,
3089 âhtien mînes aldres | eggiun scarpun,
3090 bilôsien mi lîb=u. | Ik an thesumu liohte scal
3091 thurh ûses drohtines craft | fan dôde astanden
3092 an thriddiumu dage,. | Thô uuarð thegno bezt
3093 suîðo an sorgun, | Sîmon Petrus,
3094 uuarð imu hugi hriuuig, | endi te is hêrron sprak
3095 rink an rûnun: ` | ni scal that rîki god,' quað he,
3096 `uualdand uuillien, | that thu eo sulic uuîti mikil
3097 githolos undar thesaru thiod: | nis thes tharf nigiean,
3098 hêlag drohtin.' | Thô sprak imu eft is hêrro angegin,
3099 mâri mahtig Crist -- | uuas imu an is môde hold --:
3100 `huat, thu nu uuiðeruuard bist,' quað he, | `uuilleon mînes,
3101 thegno bezto! | Huat, thu thesaro thiodo canst
3102 menniscan sidu: | thu ni uuêst the maht godes,
3103 the ik gifrummien scal. | Ik mag thi filu seggean
3104 uuârun uuordun, | thar hêr undar thesumu uuerode standad
3105 gesîðos mîne, | thea ni môtun suelten êr,
3106 huerb=en an hinenfard | êr sie himiles lioht,
3107 godes rîki sehat.' | Côs imu iungarono thô
3108 sân aftar thiu | Sîmon Petrus,
3109 Iacob endi Iohannes, | thea gumon tuêne,
3110 bêðea thea gibrôðer, | endi imu thô uppen thene berg giuuêt
3111 sunder mid them gesîðun, | sâlig barn godes,
3112 mid them thegnun thrim, | thiodo drohtin,
3113 uualdand thesaro uueroldes: | uuelde im thar uundres filu,
3114 têcno tôgean, | that sie gitrûodin thiu bet,
3115 that he selb=o uuas | sunu drohtines,
3116 hêlag heb=encuning. | Thô sie an hôhan uuall
3117 stigun stên endi berg, | antat sie te theru stedi quâmun,
3118 uueros uuiðer uuolcan, | thar uualdand Krist,
3119 cuningo craftigost | gicoren habde,
3120 that he is godkundi | iungarun sînun
3121 thurh is ênes craft | ôgean uuelde,
3122a berhtlîc biliði. |
[Fitt 38]
[Fitt index]