[Back to Fitt 35]
Fitt 36
2973b Thô giuuêt imu uualdand Crist
2974 sîðon fan themu sêe, | sunu drohtines,
2975 ênag barn godes. | Elithioda quam imu,
2976 gumon tegegnes: | uuârun is gôdun uuerk
2977 ferran gefrâgi, | that he sô filu sagde
2978 uuâroro uuordo: | imu uuas uuillio mikil,
2979 that he sulic folcskepi | frummien môsti,
2980 that sie simla gerno | gode thionodin,
2981 uuârin gehôrige | heb=encuninge
2982 mankunnies manag. | Thô giuuêt he imu ob=er thea marka Iudeono,
2983 sôhte imu Sidono burg, | habde gesîðos mid imu,
2984 gôde iungaron. | Thar imu tegegnes quam
2985 ên idis fan âðrom thiodun; | siu uuas iru aðaligeburdeo,
2986 cunnies fan Cananeo lande; | siu bad thene craftagan drohtin,
2987 hêlagna, that he iru helpe gerêdi, | quað that iru uuâri harm gistanden,
2988 soroga at iru selb=aru dohter, | quað that siu uuâri mid suhtiun bifangen:
2989 `bedrogan habbiad sie dernea uuihti. | Nu is iro dôd at hendi,
2990 thea uurêðon habbiad sie geuuitteu benumane. | Nu biddiu ik thi, uualdand frô min,
2991 selb=o sunu Dauides, | that sie af sulicum suhtiun atômies,
2992 that thu sie sô arma | êgrohtfullo
2993 uuamscaðon biuueri.' | Ni gaf iru thô noh uualdand Crist
2994 ênig anduuordi; | siu imu aftar geng,
2995 folgode fruokno, | antat siu te is fôtun quam,
2996 grôtte ina greatandi. | Giungaron Cristes
2997 bâdun iro hêrron, | that he an is hugea mildi
2998 uurði themu uuîb=e. | Thô habde eft is uuord garu
2999 sunu drohtines | endi te is gesîðun sprak:
3000 ``êrist scal ik Israheles | ab=oron uuerðen,
3001 folcskepi te frumu, | that sie ferhtan hugi
3002 hebbian te iro hêrron: | im is helpono tharf,
3003 thea liudi sind farlorane, | farlâten habbiad
3004 uualdandes uuord, | that uuerod is getuîflid,
3005 drîb=ad im dernean hugi, | ne uuilliad iro drohtine hôrien
3006 Israhelo erlskepi, | ungilôb=iga sind
3007 heliðos iro hêrron: | thoh scal thanen helpe cumen
3008 allun elithiodun.' | Agalêto bad
3009 that uuîf mid iro uuordun, | that iru uualdand Krist
3010 an is môdseb=on | mildi uurði,
3011 that siu iro barnes forð | brûkan môsti,
3012 hebbian sie hêle. | Thô sprak iru hêrro angegin,
3013 mâri endi mahtig: | `nis that,' quað he, `mannes reht,
3014 gumono nigênum | gôd te gifrummienne
3015 that he is barnun | brôdes aftîhe,
3016 uuernie im ob=ar uuilleon, | lâte sie uuîti tholean,
3017 hungar hetigrimmen, | endi fôdie is hundos mid thiu.'
3018 `Uuâr is that, uualdand,' quað siu, | `that thu mid thînun uuordun sprikis,
3019 sôðlîco sagis: | huat, thoh oft an seli innen
3020 undar iro hêrron diske | huelpos huerb=ad
3021 brosmono fulle | thero fan themu biode niðer
3022 antfallat iro frôian.' | Thô gihôrde that friðubarn godes
3023 uuillean thes uuîb=es | endi sprak iru mid is uuordun tô:
3024 `uuela that thu uuîf hab=es | uuillean gôden!
3025 Mikil is thîn gilôb=o | an thea maht godes,
3026 an thene liudio drohtin. | Al uuirðid gilêstid sô
3027 umbi thînes barnes lîf, | sô thu bâdi te mi.'
3028 Thô uuarð siu sân gihêlid, | sô it the hêlago gesprac
3029 uuordun uuârfastun: | that uuîf fagonode,
3030 thes siu iro barnes forð | brûkan môste;
3031 habde iru giholpen | hêleando Crist,
3032 habde sie farfangane | fîundo craftu,
3033 uuamscaðun biuuerid. | Thô giuuêt imu uualdand forð,
3034 barno that bezte, | sôhte imu burg ôðre,
3035 thiu sô thicco uuas | mid theru thiodu Iudeono,
3036 mid sûðarliudiun giseten. | Thar gifragn ik that he is gesîðos grôtte,
3037 the iungaron the he imu habde be is gôde gicorane, | that sie mid imu gerno geuunodun,
3038 uueros thurh is uuîson sprâka: | 'alle skal ik iu,' quað he, `mid uuordun frâgon,
3039 iungaron mîne: | huat queðat these Iudeo liudi,
3040 mâri meginthioda, | huat ik manno sî?'
3041 Imu anduuordidun frôlîco | is friund angegin,
3042 iungaron sîne: | `nis thit Iudeono folc,
3043 erlos ênuuordie: | sum sagad that thu Elias sîs,
3044 uuîs uuârsago, | the hêr giu uuas lango,
3045 gôd undar thesumu gumskepie, | sum sagad that thu Iohannes sîs,
3046 diurlîc drohtines bodo, | the hêr dôpte iu
3047 uuerod an uuatere; | alle sie mid uuordun sprekad,
3048 that thu ênhuilic sîs | eðilero manno,
3049 thero uuârsagono, | the hêr mid uuordun giu
3050 lêrdun these liudi, | endi that thu sîs eft an thit lioht cumen
3051 te uuîseanne thesumu uuerode.' | Thô sprak eft uualdand Krist:
3052 `hue queðad gi, that ik sî,' quað he, | `iungaron mîne,
3053 liob=on liuduueros?' | Thô te lat ni uuarð
3054 Sîmon Petrus: | sprak sân angegin
3055 êno for im allun | -- habde imu ellien gôd,
3056 thrîstea githâhti, | uuas is theodone hold --:
[Fitt 37]
[Fitt index]