[Back to Fitt 29]
Fitt 30
2431 Thô im eft tegegnes | gumono bezta
2432 anduuordi gesprak: | `ni mênde ik elcor uuiht', quað he,
2433 `te bidernienne | dâdio mînaro,
2434 uuordo eftha uuerco; | thit sculun gi uuitan alle,
2435 iungaron mîne, | huand iu fargeb=en hab=ad
2436 uualdand thesaro uueroldes, | that gi uuitan môtun
2437 an iuuuom hugiskeftiun | himilisc gerûni;
2438 them ôðrun scal man be biliðiun | that gibod godes
2439 uuordun uuîsien. | Nu uuilliu ik iu te uuârun hier
2440 mârien, huat ik mênde, | that gi mîna thiu bet
2441 ob=ar al thit landskepi | lêra farstandan.
2442 That sâd, that ik iu sagda, | that is selb=es uuord,
2443 thiu hêlaga lêra | heb=encuninges,
2444 huô man thea mârien scal | ob=ar thene middilgard,
2445 uuîdo aftar thesaro uueroldi. | Uueros sind im gihugide,
2446 man mislîco: | sum sulican môd dregid,
2447 harda hugiskefti | endi hrêan seb=on,
2448 that ina ni geuuerðod, | that he it be iuuuon uuordun due,
2449 that he thesa mîna lêra forð | lêstien uuillie,
2450 ac uuerðad thar sô farlorana | lêra mîna,
2451 godes ambusni | endi iuuuaro gumono uuord
2452 an themu ub=ilon manne, | sô ik iu êr sagda,
2453 that that korn faruuarð, | that thar mid kîðun ni mahte
2454 an themu stêne uppan | stedihaft uuerðan.
2455 Sô uuirðid al farloran | eðilero sprâka,
2456 ârundi godes, | sô huat sô man themu ub=ilon manne
2457 uuordun geuuîsid, | endi he an thea uuirson hand,
2458 undar fîundo folc | fard gekiusid,
2459 an godes unuuilean | endi an gramono hrôm
2460 endi an fiures farm. | Forð scal he hêtean
2461 mid is breosthugi | brêda logna.
2462 Nio gi an thesumu lande thiu lês | lêra mîna
2463 uuordun ni uuîsiad: | is theses uuerodes sô filu,
2464 erlo aftar thesaro erðun: | bistêd thar ôðar man,
2465 the is imu iung endi glau, -- | endi hab=ad imu gôdan môd --,
2466 sprâkono spâhi | endi uuêt iuuuaro spello giskêd=,
2467 hugid is than an is herton | endi hôrid thar mid is ôrun tô
2468 suîðo niudlîco | endi nâhor sted,
2469 an is breost hledid | that gibod godes,
2470 lînod endi lêstid: | is is gilôb=o sô gôd,
2471 talod imu, huô he ôðrana | eft gihuerb=ie
2472 mêndâdigan man, | that is môd draga
2473 hluttra treuua | te heb=encuninge.
2474 Than brêdid an thes breostun | that gibod godes,
2475 thie lub=igo gilôbo, | sô an themu lande duod
2476 that korn mid kîðun, | thar it gikund hab=ad
2477 endi imu thiu uurð bihagod | endi uuederes gang,
2478 regin endi sunne, | that it is reht hab=ad.
2479 Sô duod thiu godes lêra | an themu gôdun manne
2480 dages endi nahtes, | endi gangid imu diub=al fer,
2481 uurêða uuihti | endi the uuard godes
2482 nâhor mikilu | nahtes endi dages,
2483 anttat sie ina brengead, | that thar bêðiu uuirðid
2484 ia thiu lêra te frumu | liudio barnun,
2485 the fan is mûðe cumid, | iac uuirðid the man gode;
2486 hab=ad sô giuuehslod | te thesaro uueroldstundu
2487 mid is hugiskeftiun | himilrîkeas gidêl,
2488 uuelono thene mêstan: | farid imu an giuuald godes,
2489 tionuno tômig. | Treuua sind sô gôda
2490 gumono gehuilicumu, | sô nis goldes hord
2491 gelîk sulicumu gilôb=on. | Uuesad iuuuaro lêrono forð
2492 mancunnie mildie; | sie sind sô mislîka,
2493 heliðos gehugda: | sum hab=ad iro hardan strîd,
2494 uurêðan uuillean, | uuancolna hugi,
2495 is imu fêknes ful | endi firinuuerko.
2496 Than biginnid imu thunkean, | than he undar theru thiodu stâd
2497 endi thar gihôrid | ob=ar hlust mikil
2498 thea godes lêra, | than thunkid imu, that he sie gerno forð
2499 lêstien uuillie; | than biginnid imu thiu lêra godes
2500 an is hugi hafton, | anttat imu than eft an hand cumid
2501 feho te gifôrea | endi fremiði scat.
2502 Than farlêdead ina | lêða uuihti,
2503 than he imu farfâhid | an fehogiri,
2504 aleskid thene gilôbon: | than uuas imu that luttil fruma,
2505 that he it gio an is hertan gehugda, | ef he it halden ne uuili.
2506 That is sô the uuastom, | the an themu uuege began,
2507 liodan an themu lande: | thô farnam ina eft thero liudio fard.
2508 Sô duot thea meginsundeon | an thes mannes hugi
2509 thea godes lêra, | ef he is ni gômid uuel;
2510 elcor bifelliad sia ina | ferne te boðme,
2511 an thene hêtan hel, | thar he heb=encuninge
2512 ni uuird=id furður te frumu, | ac ina fîund sculun
2513 uuîtiu giuuaragean. | Simla gi mid uuordun forð
2514 lêread an thesumu lande: | ik can thesaro liudio hugi,
2515 sô mislîcan muodseb=on | manno cunnies,
2516 sô uuanda uuîsa | ............
2517 Sum hab=it all te thiu is muod gilâtan | endi mêr sorogot,
2518 huô hie that hord bihalde, | than huô hie heb=ancuninges
2519 uuilleon giuuirkie. | Bethiu thar uuahsan ni mag
2520 that hêlaga gibod godes, | thoh it thar ahafton mugi,
2521 uurtion biuuerpan, | huand it thie uuelo thringit.
2522 Sô samo sô that crûd endi thie thorn | that corn antfâhat,
2523 uueriat im thena uuastom, | sô duot thie uuelo manne:
2524 giheftid is herta, | that hie it gihuggian ni muot,
2525 thie man an is muode, | thes hie mêst bitharf,
2526 huô hie that giuuirkie, | than lang thie hie an thesaro uueroldi sî,
2527 that hie ti êuuondage | after muoti
2528 hebbian thuru is hêrren thanc | himiles rîki,
2529 sô endilôsan uuelon, | sô that ni mag ênig man
2530 uuitan an thesaro uueroldi. | Nio hie sô uuîdo ni can
2531 te githenkeanne, | thegan an is muode,
2532 that it bihaldan mugi | herta thes mannes,
2533 that hie that ti uuâron uuiti, | huat uualdand god hab=it
2534 guodes gigereuuid, | that all geginuuerd stêð
2535 manno sô huilicon, | sô ina hier minniot uuel
2536 endi selb=o te thiu | is seola gihaldit,
2537 that hie an lioht godes | lîðan muoti.'
[Fitt 31]
[Fitt index]