[Back to Fitt 16]
Fitt 17
1381 So sprac he thô spâhlîco | endi sagda spel godes,
1382 lêrde the landes uuard | liudi sîne
1383 mid hluttru hugi. | Heliðos stôdun,
1384 gumon umbi thana godes sunu | gerno suîðo,
1385 uueros an uuilleon: | uuas im thero uuordo niud,
1386 thâhtun endi thagodun, | gihôrdun thero thiodo drohtin
1387 seggean êu godes | eldibarnun;
1388 gihêt im heb=enrîki | endi te them heliðun sprac:
1389 `ôc mag ic iu seggean, | gesîðos mîna,
1390 uuârun uuordun, | that gi thesoro uueroldes nu forð
1391 sculun lioht uuesan | liudio barnun,
1392 fagar mid firihun | ob=ar folc manag,
1393 uulitig endi uunsam: | ni mugun iuuua uuerk mikil
1394 biholan uuerðan, | mid huuilico gi sea hugi cûðeat:
1395 than mêr the thiu burg ni mag, | thiu an berge stâð,
1396 hôh holmklib=u | biholen uuerðen,
1397 uurisilîc giuuerc, | ni mugun iuuua uuord than mêr
1398 an thesoro middilgard | mannum uuerðen,
1399 iuuua dâdi bidernit. | Dôt, sô ic iu lêriu:
1400 lâtad iuuua lioht mikil | liudiun skînan,
1401 manno barnun, | that sie farstandan iuuuan môdseb=on,
1402 iuuua uuerc endi iuuuan uuilleon, | endi thes uualdand god
1403 mit hluttro hugi, | himiliscan fader,
1404 lob=on an thesumu liohte, | thes he iu sulica lêra fargaf.
1405 Ni scal neoman lioht, the it hab=ad, | liudiun dernean,
1406 te hardo behuuelb=ean, | ac he it hôho scal
1407 an seli settean, | that thea gesehan mugin
1408 alla gelico, | thea thar inna sind,
1409 heliðos an hallu. | Than hald ni sculun gi iuuua hêlag uuord
1410 an thesumu landskepea | liudiun dernien,
1411 heliðcunnie farhelan, | ac ge it hôho sculun
1412 brêdean, that gibod godes, | that it allaro barno gehuuilic,
1413 ob=ar al thit landscepi | liudi farstanden
1414 endi sô gefrummien, | sô it an forndagun
1415 tulgo uuîse man | uuordun gesprâcun,
1416 than sie thana aldan êuu | erlos heldun,
1417 endi ôc sulicu suuîðor, | sô ic iu nu seggean mag,
1418 alloro gumono gehuuilic | gode thionoian,
1419 than it thar an them aldom | êuua gebeode.
1420 Ni uuâniat gi thes mit uuihtiu, | that ic bi thiu an thesa uuerold quâmi,
1421 that ic thana aldan êu | irrien uuillie,
1422 fellean undar thesumu folke | eftho thero forasagono
1423 uuord uuiðaruuerpen, | thea hêr sô giuuârea man
1424 barlîco gebudun. | Êr scal bêðiu tefaran,
1425 himil endi erðe, | thiu nu bihlidan standat,
1426 êr than thero uuordo | uuiht bilîb=a
1427 unlêstid an thesumu liohte, | thea sie thesum liudiun hêr
1428 uuârlîco gebudun. | Ni quam ic an thesa uuerold te thiu,
1429 that ic feldi thero forasagono uuord, | ac ic siu fullien scal,
1430 ôkion endi nîgean | eldibarnum,
1431 thesumu folke te frumu. | That uuas forn gescrib=an
1432 an them aldon êo | -- ge hôrdun it oft sprecan
1433 uuorduuîse man --: | sô huue sô that an thesoro uueroldi gidôt,
1434 that he âd=rana | aldru bineote,
1435 lîb=u bilôsie, | them sculun liudio barn
1436 dôd adêlean. | Than uuilleo ic it iu diopor nu,
1437 furður bifâhan: | sô huue sô ina thurh fîundskepi,
1438 man uuiðar ôðrana | an is môdseb=on
1439 bilgit an is breostun | -- huuand sie alle gebrôðar sint,
1440 sâlig folc godes, | sibbeon bitengea,
1441 man mid mâgskepi --, | than uuirðit thoh huue ôðrumu an is môde sô gram,
1442 lîbes uueldi ina bilôsien, | of he mahti gilêstien sô:
1443 than is he sân afêhit | endi is thes ferahas scolo,
1444 al sulikes urdêlies | sô the ôðar uuas,
1445 the thurh is handmegin | hôb=do bilôsde
1446 erl ôðarna. | Ôc is an them êo gescrib=an
1447 uuârun uuordun, | sô gi uuiton alle,
1448 that man is nâhiston | niudlîco scal
1449 minnian an is môde, | uuesen is mâgun hold,
1450 gadulingun gôd, | uuesen is geb=a mildi,
1451 frâhon is friunda gehuuane, | endi scal is fîund hatan,
1452 uuiðerstanden them mid strîdu | endi mid starcu hugi,
1453 uuerean uuiðar uurêðun. | Than seggeo ic iu te uuâron nu,
1454 fullîcur for thesumu folke, | that gi iuuua fîund sculun
1455 minneon an iuuuomu môde, | sô samo sô gi iuuua mâgos dôt,
1456 an godes namon. | Dôt im gôdes filu,
1457 tôgeat im hluttran hugi, | holda treuua,
1458 liof uuiðar ira lêðe. | That is langsam râd
1459 manno sô huuilicumu, | sô is môd te thiu
1460 geflîhit uuiðar is fîunde. | Than môtun gi thea fruma êgan,
1461 that gi môtun hêten | heb=encuninges suni,
1462 is blîði barn. | Ne mugun gi iu betaran râd
1463 geuuinnan an thesoro uueroldi. | Than seggio ic iu te uuâron ôc,
1464 barno gehuilicum, | that gi ne mugun mid gibolgono hugi
1465 iuuuas gôdes uuiht | te godes hûsun
1466 uualdande fargeb=an, | that it imu uuirðig sî
1467 te antfâhanne, | sô lango sô thu fîundskepies uuiht,
1468 uuid=er ôðran man | inuuid hugis.
1469 Êr scalt thu thi simbla gesônien | uuið thana sacuualdand,
1470 gemôdi gimahlean: | sîðor maht thu mêðmos thîna
1471 te them godes altere ageb=an: | than sind sie themu gôdan uuerðe,
1472 heb=encuninge. | Mêr sculun gi aftar is huldi thionon,
1473 godes uuilleon fulgân, | than ôðra Iudeon duon,
1474 ef gi uuilleat êgan | êuuan rîki,
1475 sinlîf sehan. | Ôc scal ic iu seggean noh,
1476 huuô it thar an them aldon | êo gebiudid,
1477 that ênig erl ôðres | idis ni bisuuîca,
1478 uuîf mid uuammu. | Than seggio ic iu te uuâron ôc,
1479 that thar man is siuni mugun | suuîðo farlêdean
1480 an mirki mên, | ef hi ina lâtid is môd spanen,
1481 that he beginna thero girnean, | thiu imu gegangan ni scal.
1482 Than hab=ed he an imu selb=on sân | sundea geuuarhta,
1483 geheftid an is hertan | helliuuîti.
1484 Ef than thana man is siun uuili | ettha is suîðare hand
1485 farlêdien is liðo huuilic | an lêðan uueg,
1486 than is erlo gehuuem | ôðar betara,
1487 firiho barno, | that he ina fram uuerpa
1488 endi thana lið lôsie | af is lîchamon
1489 endi ina âno cuma | up te himile,
1490 than he sô mid allun | te them inferne,
1491 huuerb=e mid sô hêlun | an helligrund.
1492 Than mênid thiu lêfhêd, | that ênig liudeo ni scal
1493 farfolgan is friunde, | ef he ina an firina spanit,
1494 suâs man an saca: | than ne sî he imu eo sô suuîðo an sibbiun bilang,
1495 ne iro mâgskepi sô mikil, | ef he ina an morð spenit,
1496 bêdid baluuuerco; | betera is imu than ôðar,
1497 that he thana friund fan imu | fer faruuerpa,
1498 mîðe thes mâges | endi ni hebbea thar êniga minnea tô,
1499 that he môti êno | up gestîgan
1500 hô himilrîki, | than sie helligethuing,
1501 brêd baluuuîti | bêðea gisôkean,
1502a ub=il arb=idi. |
[Fitt 18]
[Fitt index]