[Back to Fitt 60]
Fitt 61
5106b That uuerod al gesprac,
5107 folc Iudeono, | that he uuâri thes ferhes scolo,
5108 uuîties sô uuirðig. | Ni uuas it thoh be is geuurhtiun gidôen,
5109 that ine thar an Hierusalem | Iudeo liudi,
5110 sunu drohtines | sundea lôsen
5111 adêldun te dôðe. | Thô uuas thero dâdio hrôm
5112 Iudeo liudiun, | huat sie themu godes barne mahtin
5113 sô haftemu mêst, | harmes gefrummien.
5114 Beuurpun ina thô mid uuerodu | endi ina an is uuangon slôgun,
5115 an is hleor mid iro handun | -- al uuas imu that te hosce gidôen --,
5116 felgidun imu firinuuord | fîundo menegi,
5117 bismersprâka. | Stôd that barn godes
5118 fast under fîundun: | uuârun imu is faðmos gebundene,
5119 tholode mid githuldiun, | sô huat sô imu thiu thioda tô
5120 bittres brâhte: | ni balg ina neouuiht
5121 uuið thes uuerodes geuuin. | Thô nâmon ina uurêðe man
5122 sô gibundanan, | that barn godes,
5123 endi ina thô lêddun, | thar thero liudio uuas,
5124 there thiade thinghûs. | Thar thegan manag
5125 huurb=un umbi iro heritogon. | Thar uuas iro hêrron bodo
5126 fan Rûmuburg, | thes the thô thes rîkeas giuueld:
5127 kumen uuas he fan themu kêsure, | gisendid uuas he undar that cunni Iudeono
5128 te rihtienne that rîki, | uuas thar râdgeb=o:
5129 Pilatus uuas he hêten; | he uuas fan Ponteo lande
5130 cnôsles kennit. | Habde imu craft mikil,
5131 an themu thinghûse | thiod gisamnod,
5132 an uuarf uueros; | uuârlôse man
5133 agâb=un thô thena godes sunu, | Iudeo liudi,
5134 under fîundo folc, | quâðun that he uuâri thes ferhes scolo,
5135 that man ina uuîtnodi | uuâpnes eggiun,
5136 scarpun scûrun. | Ni uuelde thiu scole Iudeono
5137 thringan an that thinghûs, | ac thiu thiod ûte stôd,
5138 mahlidun thanen uuið thea menegi: | ni uueldun an that gimang faren,
5139 an elilandige man, | that sie thar unreht uuord,
5140 an themu dage derb=ies uuiht | adêlian ne gihôrdin,
5141 ac quâðun that sie im sô hluttro | hêlaga tîdi,
5142 uueldin iro pascha halden. | Pilatus antfeng
5143 at them uuamscaðun | uualdandes barn,
5144 sundea lôsen. | Thô an sorgun uuarð
5145 Iudases hugi, | thô he ageb=an gisah
5146 is drohtin te dôd=e, | thô bigan imu thiu dâd aftar thiu
5147 an is hugea hreuuan, | that he habde is hêrron êr
5148 sundea lôsen gisald. | Nam imu thô that silub=ar an hand,
5149 thrîtig scatto, | that man imu êr uuið is thiodane gaf,
5150 geng imu thô te them Iudiun | endi im is grimmon dâd,
5151 sundeon sagde, | endi im that silub=ar bôd
5152 gerno te ageb=anne: | `ik hebbiu it sô griolîco,' quað he,
5153 `mines drohtines | drôru gicôpot,
5154 sô ik uuêt that it mi ni thîhit.' | Thiod Iudeono
5155 ni uueldun it thô antfâhan, | ac hêtun ina forð aftar thiu
5156 umbi sulica sundea | selb=on ahton,
5157 huat he uuið is frâhon | gefrumid habdi:
5158 `thu sâhi thi selb=o thes,' quaðun sie; | `huat uuili thu thes nu sôken te ûs?
5159 Ne uuît thu that thesumu uuerode!' | Thô giuuêt imu eft thanan
5160 Iudas gangan | te themu godes uuîhe
5161 suîðo an sorgun | endi that silub=ar uuarp
5162 an thena alah innan, | ne gidorste it êgan leng;
5163 fôr imu thô sô an forhtun, | sô ina fîundo barn
5164 môdage manodun: | habdun thes mannes hugi
5165 gramon undergripanen, | uuas imu god abolgan,
5166 that he imu selb=on thô | sîmon uuarhte,
5167 hnêg thô an herusêl | an hinginna,
5168 uuarag an uurgil | endi uuîti gecôs,
5169 hard hellie gethuing, | hêt endi thiustri,
5170 diap dôd=es dalu, | huand he êr umbi is drohtin suêk.
[Fitt 62]
[Fitt index]