[Back to Fitt 50]
Fitt 51
4198 Giuuêt imu thô that barn godes | innan Bethania
4199 sehs nahtun êr, | than thiu samnunga
4200 thar an Hierusalem | Iudeo liudio
4201 an them uuîhdagun | uuerðen scolde,
4202 that sie scoldun haldan | thea hêlagon tîdi,
4203 Iudeono pascha. | Bêd the godes sunu,
4204 mahtig under theru menegi: | uuas thar manno craft,
4205 uuerodes bi them is uuordun. | Thar gengun ina tuê uuîf umbi,
4206 Maria endi Martha, | mid mildiu hugi,
4207 thionodun imu theolîco. | Thiodo drohtin
4208 gaf im langsam lôn: | lêt sea lêðes gihues,
4209 sundeono sikora, | endi selb=o gibôd,
4210 that sea an friðe fôrin | uuiðer fîundo nîd=,
4211 thea idisa mid is orlob=u gôdu: | habdun iro ambahtscepi
4212 biuuendid an is uuilleon. | Thô giuuêt imu uualdand Krist
4213 forð mid thiu folcu, | firiho drohtin,
4214 innan Hierusalem, | thar Iudeono uuas
4215 hetelîc hardburi, | thar sie thea hêlagon tîd
4216 uuarodun at themu uuîhe. | Uuas thar uuerodes sô filu,
4217 craftigaro kunnio, | thie ni uueldun Cristes uuord
4218 gerno hôrien | ni te themu godes barne
4219 an iro môdseb=on | minnie ni habdun,
4220 ac uuârun im sô uurêða | uulanka thioda,
4221 môdeg mankunni, | habdun im morðhugi,
4222 inuuid an innan: | an ab=uh farfengun
4223 Kristes lêre, | uueldun ina craftigna
4224 uuîtnon thero uuordo; | ac uuas thar uuerodes sô filu,
4225 umbi erlscepi | antlangana dag,
4226 habde ine thiu smale thiod | thurh is suôtiun uuord
4227 uuerodu biuuorpen, | that ine thie uuiðersakon
4228 under themu folcscepi | fâhen ne gidorstun,
4229 ac miðun is bi theru menegi. | Than stôd mahtig Krist
4230 an themu uuîhe innan, | sagde uuord manag
4231 firiho barnun te frumu. | Uuas thar folc umbi
4232 allan langan dag, | antat thiu liohte giuuêt
4233 sunne te sedle. | Thô te seliðun fôr
4234 mancunnies manag. | Than uuas thar ên mâri berg
4235 bi theru burg ûten, | the uuas brêd endi hôh,
4236 grôni endi scôni: | hêtun ina Iudeo liudi
4237 Oliueti bi namon. | Thar imu up giuuêt
4238 neriendeo Krist, | sô ina thiu naht bifeng,
4239 uuas imu thar mid is iungarun, | sô ine thar Iudeono ênig
4240 ni uuisse ti uuârun, | huand he an themu uuîhe stôd,
4241 liudio drohtin, | sô lioht ôstene quam,
4242 antfeng that folcscepi | endi im filu sagde
4243 uuâroro uuordo, | sô nis an thesaru uueroldi ênig,
4244 an thesaru middilgard | manno sô spâhi,
4245 liudio barno nigên, | that thero lêrono mugi
4246 endi gitellien, | the he thar an themu alahe gisprak,
4247 uualdand an themu uuîhe, | endi simlun mid is uuordun gibôd,
4248 that sie sie gereuuidin | te godes rîkie,
4249 allaro manno gehuilic, | that sie môstin an themu mâreon daga
4250 iro drohtines | diuriða antfâhen.
4251 Sagde im huat sie it sundiun frumidun | endi simlun gibôd,
4252 that sie thea aleskidin; | hêt sie lioht godes
4253 minnion an iro môde, | mên farlâten,
4254 ab=oha ob=arhugdi, | ôdmôdi niman,
4255 hlaðen that an iro hertan; | quað that im than uuâri heb=enrîki,
4256 garu gôdo mêst. | Thô uuarð thar gumono sô filu
4257 giuuendid aftar is uuillion, | sîður sie that uuord godes
4258 hêlag gihôrdun, | heb=encuninges,
4259 antkendun craft mikil, | kumi drohtines,
4260 hêrron helpe, | ia that heb=enrîki uuas,
4261 neriendi ginâhid | endi nâða godes
4262 manno barnun. | Sum sô môdeg uuas
4263 Iudeo folkes, | habdun grimman hugi,
4264 slîðmôden seb=on | ........,
4265 ni uueldun is uuorde gilôb=ien, | ac habdun im geuuin mikil
4266 uuið thea Cristes craft: | kumen ni môstun
4267 thea liudi thurh lêd=en strîd, | that sie gilôb=on te imu
4268 fasto gifengin; | ni uuas im thiu frume gib=iðig,
4269 that sie heb=enriki | habbien môstin.
4270 Geng imu thô the godes sunu | endi is iungaron mid imu,
4271 uualdand fan themu uuîhe, | all sô is uuillio geng,
4272 iac imu uppen thene berg gistêg | barn drohtines:
4273 sat imu thar mid is gesîðun | endi im sagde filu
4274 uuâroro uuordo. | Sî bigunnun im thô umbi thene uuîh sprekan,
4275 thie gumon umbi that godes hûs, | quâðun that ni uuâri gôdlîcora
4276 alah ob=ar erðu | thurh erlo hand,
4277 thurh mannes giuuerk | mid megincraftu
4278 rakud arihtid. | Thô the rîkio sprak,
4279 hêr heb=encuning | -- hôrdun the ôðra --:
4280 `ik mag iu gitellien,' quað he, | `that noh uuirðid thiu tîd kumen,
4281 that is afstanden ni scal | stên ob=ar ôðrumu,
4282 ac it fallid ti foldu | endi fiur nimid,
4283 grâdag logna, | thoh it nu sô gôdlîc sî,
4284 sô uuîslîco giuuarht, | endi sô dôd all thesaro uueroldes giscapu,
4285 teglîdid grôni uuang.' | Thô gengun imu is iungaron tô,
4286 frâgodun ina sô stillo: | `huô lango scal standen noh,' quâd=un sie,
4287 `thius uuerold an uunniun, | êr than that giuuand kume,
4288 that the lasto dag | liohtes skîne
4289 thurh uuolcanskion, | eftho huan is thîn eft uuân kumen
4290 an thene middilgard, | manno cunnie
4291 te adêlienne, | dôdun endi quikun?
4292 frô mîn the gôdo, | ûs is thes firiuuit mikil,
4293 uualdandeo Krist, | huan that giuuerðen sculi.'
[Fitt 52]
[Fitt index]