[Back to Fitt 1]

Fitt 2

94 Thô uuarð thiu tîd cuman, -- | that thar gitald habdun
95 uuîsa man mid uuordun, -- | that scolda thana uuîh godes
96 Zacharias bisehan. | Thô uuarð thar gisamnod filu
97 thar te Hierusalem | Iudeo liudio,
98 uuerodes te them uuîha, | thar sie uualdand god
99 suuîðo theolîco | thiggean scoldun,
100 hêrron is huldi, | that sie heb=ancuning
101 lêðes alêti. | Thea liudi stôdun
102 umbi that hêlaga hûs, | endi geng im the gihêrodo man
103 an thana uuîh innan. | That uuerod ôðar bêd
104 umbi thana alah ûtan, | Ebreo liudi,
105 huuan êr the frôdo man | gifrumid habdi
106 uualdandes uuilleon. | he thô thana uuîrôc drôg,
107 ald aftar them alaha, | endi umbi thana altari geng
108 mid is rôcfatun | rîkiun thionon,
109 -- fremida ferhtlîco | frâon sînes,
110 godes iungarskepi | gerno suuîðo
111 mid hluttru hugi, | man hêrren scal
112 gerno fulgangan --, | grurios quâmun im,
113 egison an them alahe: | hie gisah thar aftar thiu ênna engil godes
114 an them uuîhe innan, | hie sprac im mid is uuordon tuo,
115 hiet that fruod gumo | foroht ni uuâri,
116 hiet that hie im ni andriede: | `thîna dâdi sind,' quathie,
117 `uualdanda uuerðe | endi thîn uuord self,
118 thîn thionost is im an thanke, | that thu sulica githâht hab=es
119 an is ênes craft. | Ic is engil bium,
120 Gabriel bium ic hêtan, | the gio for goda standu,
121 anduuard for them alouualdon, | ne that he me an is ârundi huarod
122 sendean uuillea. | Nu hiet he me an thesan sîð faran,
123 hiet that ic thi thoh gicûðdi, | that thi kind giboran,
124 fon thînera alderu idis | ôdan scoldi
125 uuerðan an thesero uueroldi, | uuordun spâhi.
126 That ni scal an is lib=a gio | lîðes anbîtan,
127 uuînes an is uueroldi: | hab=ed im uurdgiscapu,
128 metod gimarcod | endi maht godes.
129 Hêt that ic thi thoh sagdi, | that it scoldi gisîð uuesan
130 heb=ancuninges, | hêt that git it heldin uuel,
131 tuhin thurh treuua, | quað that he im tîras filu
132 an godes rîkea | forgeb=an uueldi.
133 He quað that the gôdo gumo | Iohannes te namon
134 hebbean scoldi, | gibôd that git it hêtin sô,
135 that kind, than it quâmi, | quað that it Kristes gisîd=
136 an thesaro uuîdun uuerold | uuerðan scoldi,
137 is selb=es sunies, | endi quað that sie sliumo herod
138 an is bodskepi | bêðe quâmin'.
139 Zacharias thô gimahalda | endi uuið selb=an sprac
140 drohtines engil, | endi im thero dâdeo bigan,
141 uundron thero uuordo: | `huuô mag that giuuerðan sô', quað he,
142 `aftar an aldre? | it is unc al te lat
143 te giuuinnanne, | thu mid thînun uuordun gisprikis.
144 Huuanda uuit habdun aldres êr | efno tuêntig
145 uuintro an uncro uueroldi, | êr than quâmi thit uuîf te mi;
146 than uuârun uuit nu atsamna | antsib=unta uuintro
147 gibenkeon endi gibeddeon, | siðor ic sie mi te brûdi gecôs.
148 uuit thes an uncro iuguði | gigirnan ni mohtun,
149 that uuit erb=iuuard | êgan môstin,
150 fôdean an uncun flettea, | nu uuit sus gifrôdod sint
151 -- hab=ad unc eldi binoman | elleandâdi,
152 that uuit sint an uncro siuni gislekit | endi an uncun sîdun lat;
153 flêsk is unc antfallan, | fel unscôni,
154 is unca lud giliðen, | lîk gidrusnod,
155 sind unca andbâri | ôðarlîcaron,
156 môd endi megincraft --, | uuit giu managan dag
157 uuârun an thesero uueroldi, | mi thes uundar thunkit,
158 huuô it giuuerðan mugi, | thu mid thînun uuordun gisprikis'.
[Fitt 3] [Fitt index]