[Back to Fitt 10]

Fitt 11

859 Than uuas im Iohannes | fon is iuguðhêdi
860 auuahsan an ênero uuôstunni; | thar ni uuas uuerodes than mêr,
861 bûtan that he thar êncora | alouualdon gode,
862 thegan thionoda: | forlêt thioda gimang,
863 manno gimênðon. | Thar uuarð im mahtig cuman
864 an thero uuôstunni | uuord fon himila,
865 gôdlîc stemna godes, | endi Johanne gibod,
866 that he Cristes cumi | endi is craft mikil
867 ob=ar thesan middilgard | mârean scoldi;
868 hêt ina uuârlîco | uuordun seggean,
869 that uuâri heb=anriki | helid=o barnun
870 an them landscepi, | liudiun ginâhid,
871 uuelono uunsamost. | Im uuas thô uuilleo mikil,
872 that he fon sulicun sâldun | seggean môsti.
873 Giuuêt im thô gangan, | al sô Jordan flôt,
874 uuatar an uuilleon, | endi them uueroda allan dag,
875 aftar them landscepi | them liudiun cûðda,
876 that sie mid fastunniu | firinuuerc manag,
877 iro selb=oro | sundia bôttin,
878 `that gi uuerðan hrênea,' quað he. | `Heb=anriki is
879 ginâhid manno barnun. | Nu lâtad eu an euuan môdseb=on
880 euuar selb=oro | sundea hreuuan,
881 lêdas that gi an thesun liohta fremidun, | endi mînun lêrun hôread,
882 uuendeat aftar mînun uuordun. | Ic eu an uuatara scal
883 gidôpean diurlîco, | thoh ic euua dâdi ne mugi,
884 euuar selb=aro | sundea alâtan,
885 that gi thurh mîn handgiuuerc | hluttra uuerðan
886 lêðaro gilêsto: | ac the is an thit lioht cuman,
887 mahtig te mannun | endi undar eu middiun stêd,
888 -- thoh gi ina selb=un | gisehan ni uuillean --,
889 the eu gidôpean scal | an euues drohtines namon
890 an thana hâlagon gêst. | That is hêrro ob=ar al:
891 he mag allaro manno gihuuena | mêngithâhteo,
892 sundeono sicoron, | sô huene sô sô sâlig môt
893 uuerðen an thesaro uueroldi, | that thes uuilleon hab=ad,
894 that he sô gilêstea, | sô he thesun liudiun uuili,
895 gibioden barn godes. | Ic bium an is bodskepi herod
896 an thesa uuerold cumen | endi scal im thana uueg rûmien,
897 lêrean thesa liudi, | huuô sea sculin iro gilôb=on haldan
898 thurh hluttran hugi, | endi that sie an hellea ni thurb=in,
899 faran an fern that hêta. | Thes uuirðid sô fagan an is môde
900 man te sô managaro stundu, | sô huue sô that mên forlâtid,
901 gerno thes gramon anbusni, | -- sô mag im thes gôdon giuuirkean,
902 huldi heb=encuninges, | -- sô huue sô hab=ad hluttra treuua
903 up te them alomahtigon gode.' | Erlos managa
904 bi them lêrun thô, | liudi uuândun,
905 uueros uuârlîco, | that that uualdand Krist
906 selbo uuâri, | huuanda he sô filu sôðes gisprac,
907 uuâroro uuordo. | Thô uuarð that sô uuîdo cûð
908 ob=ar that forgeb=ana land | gumono gihuuilicum,
909 seggiun at iro selðun: | thô quâmun ina sôkean tharod
910 fon Hierusalem | Iudeo liudio
911 bodon fon theru burgi | endi frâgodun, ef he uuâri that barn godes,
912 `that hêr lango giu', quâðun sie, | `liudi sagdun,
913 uueros uuârlîco, | that he scoldi an thesa uuerold cuman'.
914 Iohannes thô gimahalde | endi tegegnes sprac
915 them bodun baldlîco: | `ni bium ic,' quað he, `that barn godes,
916 uuâr uualdand Krist, | ac ic scal im thana uueg rûmien,
917 hêrron mînumu.' | Thea heliðos frugnun,
918 thea thar an them ârundie | erlos uuârun,
919 bodon fon thero burgi: | `ef thu nu ni bist that barn godes,
920 bist thu than thoh Elias, | the hêr an êrdagun
921 uuas undar thesumu uuerode? | He is uuiscumo
922 eft an thesan middilgard. | Saga ûs huuat thu manno sîs!
923 Bist thu ênig thero, | the hêr êr uuâri
924 uuîsaro uuârsaguno? | Huuat sculun uui them uuerode fon thi
925 seggean te sôðon? | Neo hêr êr sulic ni uuarð
926 an thesun middilgard | man ôðar cuman
927 dâdiun sô mâri. | Bihuuî thu hêr dôpisli
928 fremis undar thesumu folke, | ef thu tharo forasagono
929 ênhuuilic ni bist?' | Thô habde eft garo
930 Iohannes the gôdo | glau anduuordi:
931 `Ic bium forabodo | frâon mînes,
932 liob=es hêrron; | ic scal thit land recon,
933 thit uuerod aftar is uuillion. | Ic hebbiu fon is uuorde mid mi
934 stranga stemna, | thoh sie hêr ni uuillie forstandan filo
935 uuerodes an thesaro uuôstunni. | Ni bium ic mid uuihti gilîc
936 drohtine mînumu: | he is mid is dâdiun sô strang,
937 sô mâri endi sô mahtig | -- that uuirðid managun cûð,
938 uuerun aftar thesaro uueroldi | -- that ic thes uuirðig ni bium,
939 that ic môti an is giscuoha, | thoh ic sî is scalc êgan,
940 an sô rîkiumu drohtine | thea reomon antbindan:
941 sô mikilu is he betara than ic. | Nis thes bodon gimaco
942 ênig ob=ar erðu, | ne nu aftar ni scal
943 uuerðan an thesaro uueroldi. | Hebbiad euuan uuillion tharod,
944 liudi euuan gilôb=on: | than eu lango scal
945 uuesan euua hugi hrômag; | than gi helligithuuing,
946 forlâtad lêðaro drôm | endi sôkead eu lioht godes,
947 upôdes hêm, | êuuig rîki,
948 hôhan heb=enuuang. | Ne lâtad euuan hugi tuuîflien!'
[Fitt 12] [Fitt index]